السلام عليكم احنا مجموعة من طالبات جامعة ام القرى انهينا السنة التحضيرية للمسار الصحي وحبينا نشاركم بتجربتنا عشان تكونو فكرة مبسطة عن التحضيري ، حطينالكم ١١ تجربة كل تجربة تختلف عن الثانية نتمنى منكم تقروها كلها عشان تستفيدو من كل النواحي وتتعلمو من اغلاطنا ومن الطرق الصحيحة اللي اتبعناها .

تابعونا على تويتر : med_pre@

التجربة الاولى  :

السلام عليكم ...

اول شي انا درست ١٠ سنين في بريطاينا وتقدروا تقولوا اني مدركة للانقلش 😂 ... اول ما جاني القبول  كنت مرا متحمسه خلاص نادوني دكتوره رهف ... 😂😂😌، كان اكبر همي من فين اشتري السكراب ... اول يوم دخلت التحضيري ... كنت متحمسة واذاكر اول بأول .. وكان كل شي حلو طيب؟

بعدها فجأة استهترت وقلت ما ليه داعي خلاص بالويك اند اذاكر .. الحمد لله مارح يكون صعب انا اعرف انقلش ... شويه واخلص ... مشيت على دا الشي واشوف البنات فالسناب بيضيعوا وقتهم ... وكتير من بنات الدفعة كمان يحاولوا يحبطوا ... مرا لا تسمعوا لأي احد ولا تسمعوا لأحد يقول خبصت فالاخير بنات الجامعه غير البنات الي عرفتيهم فالثنوي ... كتير ما يبوا غير مصلحة نفسهم وانا طيبة وعلى نياتي ما أحط على بالي احد ...انتي كوني مع نفسك لا تفكري بغيرك من ناحية الدفعة نازلة او احسن مني ... انا كنت اقول ما يذاكروا اقول خلاص كلنا فالهوا سوى ... بس طبعا جا المد والحمد لله جزئية كبيرة منه كانت سهلة ونسبيا حليت .. يعني اكتر شي نقصت ٥ درجات  ...

بعد المد يمكن جاني خمول عشان اعطيت المد جهد كبير وما سرت اذاكر .. جا الفاينل ... وانا مني مختمة ... طبعا بكلمكم عن الكيمياء الحيوية ( البايو ) ... وفالليل قبل بيوم من الاختبار ختمته ... وصحيت الصباح يا دوبك ذاكر بسرعة .. وما ركزتها ... ودخلت الاختبار وخببببصصصت والترم عدا على خير وانا اسمع كلام الناس الي يقول خبصت والي يقول مستوى الدفعة نازل .. وانا اقول الحمدلله شكلها درجاتي تعتبر حلوه ... اذا الدفعة كلها مخبصة فبسهولة اقدر ادخل التخصص الي حابته .. وما عندي مشكلة ...

بدأت الترم التاني ...

برضو على نفس الوضع وشديت فالبداية بعدين استهترت ... جا المد حق البايو ... وحسيت نفسي حليت ... بس عشان ما كنت اذاكر اول بأول خبصت وجبت العيد وجبت درجه مره نازله ... ومرا زعلت وخلاص قررت اسيب المسار الصحي وخرجت من كل قروبات الجامعه 😂😂😭.... قلت المسار الصحي مو ليا ... بس بعدين أتشجعت وشديت على نفسي ومرا ذاكرت ... والحمد لله للفاينل قدرت ارفع مستوايا وجبت درجه حلوه ..... وحتى المواد السهلة ما ينفع الواحد يستهتر فيها ... ممكن تكون سهلة ... ودا الشي يكون كويس ... فلازم تذاكروا .. عشان لا يكون الاستهتار سبب انك فالاخير تنقص فيها ... وينزل المعدل

فالاخير نصيحتي هيه انو الانقلش ممكن يكون دافع ليك . يا اما يكون لمصلحتك او ممكن يكون سبب انك تستهتر وما تدخل التخصص إليّ حابه

انت تحدد فالاخير 😍

‎رهف حلواني ، صيدلة

ـTwitter : @rhalf

التجربة الثانية :

السلام عليكم ، شوفو صراحة مدري كيف ابدا بس بداية احب اقلكم كل انسان في الحياة عندو تجربة غير عن الباقين بسبب اختلاف الشخصيات والقدرات فانتو حاولو تستفيدو من تجاربنا وخدو المفيد واتعلمو من اغلاطنا واللي سوينا بس افتكرو محا يمر عليكم نفس الشي ١٠٠٪ لانو كل شخص فينا غير .

التحضيري سنة مصيرية بالنسبة لكم لانكم قاعدين في الوسط لا انكم ثانوي ولا انكم متخصصين فلازم تجتهدو فيها وتعطوها كل اللي عندكم عشان تحققو احلامكم باذن الله

حتسمعو كتير يحبطوكم منها وانها صعبة وما تقدرو تعدوها ولا حتجيبو درجات انا سمعت دا الكلام كثير وكان ياثر عليا مررة فالترم الاول بس بعدين اتداركت وضعي الحمدلله وعرفت انو الخوف اكبر مصيبة ممكن تضيعني ، في البداية حتحسو بصعوبة وحتترجمو كتير وممكن المحاضرة تقعدو بالايام فيها وتتنحو وتبلمو في اول المحاضرات وتبكو ونفسية زفت بس عادي صدقوني ٣ اسابيع بالكثير وحتخشو فالجو وحتتعودو والانقلش يسير سهل وصدقوني المذاكرة بالانقلش اسهل وحتكتشفو نهاية السنة قد ايش سرتو تعرفو فوكابلري كتير وكلامكم ومستواكم اتحسنو ١٨٠ درجة بسبب التحضيري وصدقوني انا شخصيا اعرف كثثثير بنات معدلهم ٤ من ٤ او قريب ولا تستغربو مر ة مو صعب تجيبوها مدام حطيتو الموضوع فمخكم

طيب اش الخلطة اللي تخليكم تجيبو ٤ من ٤ ؟

بسيطة مرة واللي هيا المذاكرة اول باول صدقووني اللي تذاكر اول باول دي هيا الفنانة واللي حتجيب اعلى درجة لانها تزاكر وما تراكم ويجي كويز تراجع ويجي الميد تيرم وتراجع ويجي الفاينل وهيا صامة ام المنهج ومرتاحة وتنام واخلاقها ونفسيتها عال العال انتو جربو بس وصدقوني بتدعولي انا فالثنوي مرة كنت اسيب للاسبوع الميت ولعب لكن الجامعه خدوها ملاحظة تراكمي ما ينننفعععععععع وبدون ايا مبالغة في ناس كتير رسبت لانو المناهج مستحيل تتلم فيومين زي الثنوي فانتو اسمعو كلامي وخلوكم فالسليم وذاكرو اول باول وحتضمنو ال A+ فكل المواد ان شاء اللله

نومكم حيقل كتثير وممكن تمنعو نفسكم من خرجات بس عادي افتكرو هيا سنة بس حتحدد حياتكم لا تلعبو هنا مافي وقت للعب حقيقي المقاعد الكل بيتنافس عليها . واللخبطة فالبداية بس عالترم التاني الحمدلله خلاص سرت فاهمة ومرتبه وضعي واخرج وانام واتفرج مسلسلاتي وازاكر وزي الفل الحمدلله فشوفو انا اشتريت بلانر * منظم مهام * من اول السنة معايا كنت اكتب اش لازم اسوي كل يوم بيومو فكنت اتحمس انجز واكتب لنفسي عبارات وكدا شي يفتحلي نفسي فكنت ارتب وضعي بحيث ما يخلص الاسبوع الا وانا مخلصة كل محاضرات الاسبوع في شي كنت اخلي لوسط الاسبوع وشي للويكيند انتو ووضعكم واللي تبو بس قسمتو بحيث ما اراكم على نفسي واقدر اطلع وانبسط وفنفس الوقت اخلص بس كنت انضغط شوية لانو كنت اروح عند خصوصين بس عادي حتحسو الجامعة مهما نفسيتكم خربت وتعبتو بس مستمتعين لانو دا حلمكم .

طيب حتكلملكم عن المواد بالتفصيل بس حقلكم على كم مصطلح في البداية للي ما عندو خلفية :

كويز : اختبار قصير عادة من ٥ درجات مو فكل المواد 

ميد تيرم : اختبار نصفي عادة يكون من ٣٠ درجة واحيانا ٤٠ او ٢٥ 

فاينل : اختبار نهائي عادة يكون من ٥٠ درجة واحيانا ٤٠ او ٦٠

لاب : المعمل ومو كل المواد فيها اختبارات معمل وعادة من ١٥ او ٢٥ درجة

شابتر : الفصل يعني الفصل الاول الفصل الثاني وكدا

الساعات حقت كل مادة : معناتها كل ما كانت ساعات المادة كثيرة كل ما كانت مادة مهمة يعني لو جبتي فيها درجة عالية معدلك زي الفل ولو خبصتي فيها معدلك طار

طيب نبدا بالمواد :

الترم الاول : اللغة الانجليزية ، الفيزياء الطبية ، الكيمياء الحيوية ( البايو ) ، الوراثة البشرية ( جينتك ) ، حاسب آلي.

١ - اللغة الانجليزية :

الساعات : ٦ ساعات 

نظام التدريس : في دكتورات كثير فكل شعبة دكتورتهم غير 

ساعات الدراسة : تختلف باختلاف المستوى

طبعا المادة عليها ٦ ساعات فدا يعني انها مرة مهمة ولازم تضمنو ال A+ او عالاقل A فيها

اول شي حيحددولكم يوم تختبرو في اختبار تحديد مستوى وعلى حسب درجاتكم حيقسموكم في قروبات

المستوى الاول : ٣ كتب وحتدرسو ٢٠ ساعة في الاسبوع انقلش .

المستوى الثاني : كتابين وحتدرسو  ١٦ ساعة في الاسبوع انقلش .

المستوى الثالث : كتاب واحد وحتدرسو ٨ ساعات في الاسبوع انقلش .

الاختبار حيكون مستوى اعلى من الكتب بس عادي حيكون ليسننق وريدنق وفوكابلري وقرمر 

الاحسن تحاولو تطورو لغتكم في الاجازة وتحلو في وتدخلو مستوى ثالث وترتاحو حتدرسو ساعات اقل 

المستوى ترا محا يفرق فالعمدل او درجات او اي شي اللهم انو اللي مستواهم ضعيف حيدرسو كتب زيادة عشان يتطور مستواهم واللي مستواهم كويس يدرسو كتب اقل عشانهم ما شاء الله وكمان يداومو وقت اقل بكتير.

تقسيم الدرجات :

الميد تيرم : ٣٠ درجة 

بالنسبة للمستوى الاول اظنو مقسم ما بين الكتاب الاول والثاني مو متاكدة واللي تختبرو في الميد ما يدخل في الفاينل

بالنسبة للمستوى الثاني حيكون الميد في الكتاب الاول كامل وما يزاكرو في الفاينل

بالنسبة للمستوى الثالث في نص الكتاب بعدين الكتاب كامل في الفاينل

الفاينل : ٥٠ درجة

الكل حيختبر في الكتاب الاحمر .

الدكتورة : ٢٠ درجة

كل دكتورة ومزاجها في بعضهم يدوها كدا وبعضهم يقسموها على كويزات وبرزنتيشن وحضور وغياب وتاخير وواجبات فانتي وحظك

بس الاغلب بياخدها كاملة احنا دكتورتنا ما تحاسب الا على كويزات ولا قد دققت عالغياب ولا قد سوينا برزنتيشن وقروبات تانية عكسنا مرة

-للي ما فهم : هيا كلها ٣ كتب اخضر وازرق واحمر الاول حيدرسو الاخضر والازرق والاحمر اما الثاني الازرق والاحمر اما الثالث الاحمر .

المادة مرة سهللللة واشياء معروفة بس لا تستهتروووو عليها ساعات كتير انا استهرت وما زاكرتتها اول باول ومرضت وقت الميد ونقصت ٧ درجات بععدين اتداركت وضعي وادونا بونس الحمدلله والقرمر نفسو حق الثنوي بريزنت وباست وفيوتشر وفوكابلري واضح كل كتاب فيلو ١٢ يونت تقريبا هوا مشكلتو تقريبا فاليوم ٤ ساعات ورا بعض وبينهم بريك لا تخافو بس عادي تر المادة لطيفة حتتحكو وتسمعو قصص وتتكلمو واشياء لطيفة وكدا ، حيدوكم كويزات من القسم ركززززززوووو عليييييها الاختبار جا منها كتتتتتير .

٢ ـ الفيزيا الطبية :

الساعات : ٤ ساعات 

نظام التدريس : في دكتورات كثير فكل كم شعبة عندهم نفس الدكتورة

ساعات الدراسة : ٣ ساعات نظري وساعتين عملي في الاسبوع 

تقسيم الدرجات :

الميد تيرم : ٣٠ درجة 

المنهج عبارة عن ٧ شباتر ( فصول يعني ) جزئية الميد لا تقل عن ٣ ولا تزيد عن ٤ شباتر كل سنة غير 

الفاينل : ٤٠ درجة

حيكون المنهج كامل معاكم

الاب والكويزات : ٣٠ درجة

هنا مني فاكرة بالزبط كم كم بس تقريبا ٢٥ درجة عالمعمل مقسمة ما بين اختبار عملي عملي وعملي نظري  و ٥ درجات عالكويزات 

شوفو دي المادة اكتر مادة انسبت في الحياة واكتر مادة عانينا منها كنا نشوف اننا مسار طبي لي ندرس فيزيا ؟ وما زلت مقتنعة بدا الشي وما اطيقها بس لازم تجبرو نفسكم لانها عليها الساعات كتيرة وتلعب فالمعدل شوفو تراها مرة مو صعبة بس مي سهلة يبالكم جهد وتحلو كثثثثثثثثثثثثثير قد شعر راسكم لانو يسوو خدع كتيرة فالاسئلة فلما تحلو وتدربو كتير حتحسو تفاهة مرة وهيا مي صعبة وكل مواضيعها اخدناها فالثنوي بس اللهم اختلافات زي التحويلات والتسارع والحركة والاحتكاك والعزم والمتجهات والمرايا والعدسات ونيوتن وقوانيو والاشعاعات تقريبا واكتر شي يلعبو في التحويلات انتبهو وايا شي تقولو الدكتورة اكتبو الاختبار كلو يكون مسائل ما عدا سوالين او ٣ نظري دي المادة مشكلتها السوال بدرجتين فالنصفي والفاينل ١.٧ تقريبا فلازم تنتبهوو مزبوط وانتو تحلو عشان لا تطير الدرجتين ، ادونا بعد كل شابتر القسم اسئلة ركزو عليها جاتنا منها كتير في الاختبار ، اما بالنسبة للعملي فهوا جدا تافه ودرجتو مضمونة ان شاء الله والكويزات كمان حتختبرو كتتتتير والدكتورة حتاخد الاحسن ، دي المادة حتطقو منها بسبب الكويزات حتختبرو كويز في كل الشباتر وواجبات كتيرة بس فالفاينل حتلاقو نفسكم مدركين اشياء كتيرة وحيدوكم كمان كتاب فيلو اسئلة الواجب مرة مهمة دي المادة لا تسيبو حرف ما تفهمو

٣ - الكيمياء الحيوية :

الساعات : ساعتين 

نظام التدريس : حتاخدوها في مدرج مع شعبتين او ٣ كل جزئية تدرسها دكتورة هما ٣ او ٤ دكتورات طوال الترم لكل الشعب نفسهم

ساعات الدراسة : ساعة نظري وساعتين عملي في الاسبوع 

تقسيم الدرجات :

الميد تيرم : ٢٥ درجة

المنهج كلو ١٢ محاضرة تقريبا الميد حيكون ما بين ٤ او ٦ محاضرات 

الفاينل : ٦٠ درجة

المنهج كامل

الاب : ١٥ درجة

حيكون اختبار عملي نظري من ٥ درجات واختبار عملي عملي من ١٠ درجات

شوفو اللي يعرف احد قد درس تحضيري حيعرف دي المادة انسسسسسببببببت لليل اسمعو طنشو والله حتى انا كنت اسب واطقطق الصراحة بس يعني اسمعو تراها احلى مادة مرة كدا معلوماتها جميلة هيا حتتقسم لكربوهيدرات ووبروتين وليبد ( دهون ) وفيتامينات ومعادن الترم الاول اساسياتو بسيطة هيا دي المادة مشكلتها دسمة ومعلوماتها كتيرةلكن مرة ممتعة وكمان الاسئلة حقت يجيب المعلومة بس بلف ودوران فلازم تزاكروهاااا اول بااااااول ولا منجد حتضيعو وكتير رسبو بسبب استهتارهم فيها . لازم تحفظو وتفهمو فنفس الوقت واخصروكم من الكلام اللي لا يودي ولا يجيب اللي يجتهد ربي ما يضيعلو تعب وبالنسبة للاب انتبهو زاكرو احنا ما كنا ندري انو شي مهم وجينا زاكرنا قبل العملي النظري بشوية ما كنا ندري انو في اصلا وطول الترم ننام في الابات فانتبهو مرة وترا مرة سهل ودكاتره الابات مرة لطيييفات حتسلمو ريبورتات بعد كل تجربة وانتبهو تحلو كويس موو تنقشو الحل لانو يحاسبو عليها والعملي ١٢ محاضرة غير عن ال ١٢ الاساسية ومرتبطة بيها ما تفرق كتير اما العملي النظري مرة تافه والتجارب مرة سسسهلة زي الثنوي ، دي المادة اصحكم تقولو ما يجي اسحب علي ترا يجيبو من كل حرف وكل سطر وكل سلايدة فصمو ام امها وركزو فالمحاضرات واكتبو الاشياء اللي مهي مكتوبة فالسلايدات ضروري لانو يسالو فكل شي .

٤ - الوراثة البشرية :

الساعات : ساعتين 

نظام التدريس : حتاخدوها في مدرج مع شعبتين او ٣ كل جزئية تدرسها دكتورة هما ٣ او ٤ دكتورات طوال الترم لكل الشعب نفسهم

ساعات الدراسة : ساعتين نظري في الاسبوع 

تقسيم الدرجات :

الميد تيرم : ٤٠ درجة

المنهج كلو ١٢ محاضرة تقريبا الميد حيكون ما بين ٤ او ٦ محاضرات 

الفاينل : ٦٠ درجة

المنهج كامل

المادة سهلة ولطيفة وكلامها اغلبو زي الثنوي عن الدي ان اي والكروموسومات والانقسامات والطفرات زي احياء ٣ بالزبط بس فروقات بسيطة واوسع واسئلتها سهلة وواضحة بس لا تستهرو فيها فيها دسامه خصوصا اخر المحاضرات .

٥- الحاسب الآلي :

الساعات : ساعتين

نظام التدريس : في دكتورات كثير فكل كم شعبة عندهم نفس الدكتورة

ساعات الدراسة : ٤ ساعات في الاسبوع 

تقسيم الدرجات :

الميد تيرم : ٣٠ درجة

المنهج كلو ٤ شباتر الميد شابترين تقريبا

الفاينل : ٤٠ درجة

المنهج كامل

العملي : ١٠ درجات 

اكسل وورد وبوربوينت

الكويزات : ٢٠ درجة

سهلة وواضحة مرة والمادة الوحيدة اللي كويزاتها من القسم حتختبروها اون لاين 

المادة دي فجيبكم حتى لو انكم نايمين فالمحاضرات تقدرو تمشو لانو الاسئلة سهلة وواضحة والكلام سهل بس مشكلتو ترجمة كتير لكن مرة تاففففهة بس لا تستهرو اول شابتر فيها شوية طويل وكدا مالو داعي والباقي سهل حتدرسو ابل واندرويد واشياء بالعقل هيا المادة كلها حفظ اصلا بس سهلة مرة ، في البداية حتتكلم عن اجيال الحاسب والكيبورد والماوس وطرق اتصال واشياة سهلة بعدين عن الشبكات ابل واندرويد والشلة والمكتبة الالكترونية والتجارة الالكترونية مرة سهلة وترا الاسئلة من كل سلايدة لا تسحبو على شي ومليانة التعاريف مليانة ندروها كلها فورقة وكل تعريف مو لازم تصمو بس خدو مفتاح يدلكم علي وخلاص وكمان مليانه اختصارات نفس الشي طلعوها كلها على جنب في ورقة ، اول ٤ شباتر بس نظري واخر ٣ شباتر بس عملي .

* كدا خلصنا من الترم الاول يعتبر اصعب من الثاني لانو البداية والبدايات صعبة وشوية مليان لانو فيلو لابات كتيرة واختبار كتيرة كويزات وميد وفاينل وعملي وعملي نظري بس نهايتو تحسو بانججججااااازززززز غير تحسو قطعتو مشوار طويل نصيحتي لا تستهترو ولا تستسلمو للسلبيات والايام الصعبة وايا شي عادي فالبداية مرة انكم تجيبو العيد وكل شوية حتتحسنو وعادي اول اختبارات تخبصو شوية بس بعدين تجيبو فل مارك وكلنا عدينا وتقدرو تعدو وانتو قدها واحنا معاكم . *

الترم الثاني : اللغة الانجليزية الطبية، مهارات التعلم ، الكيمياء الحيوية ( البايو ) ٢ ، علم وظائف الاعضاء ( فسيولوجي ) ، مهارات برمجة الحاسب الآلي .

١ - اللغة الانجليزية الطبية :

الساعات : ٤ ساعات 

نظام التدريس :  في دكتورات كثير فكل شعبة دكتورتهم غير

ساعات الدراسة : ١٦ ساعة في الاسبوع

تقسيم الدرجات :

الميد تيرم : ٣٠ درجة

الكتاب الاول كامل

الفاينل : ٥٠ درجة

الكتاب الثاني كامل

الدكتورة  : ٢٠ درجة

كل دكتورة ومزاجها في بعضهم يدوها كدا وبعضهم يقسموها على كويزات وبرزنتيشن وحضور وغياب وتاخير وواجبات فانتي وحظك بس الاغلب بياخدها كاملة احنا دكتورتنا ما تحاسب الا على كويزات ولا قد دققت عالغياب ولا قد سوينا برزنتيشن وقروبات تانية عكسنا مرة

هادي المادة مافيها مستويات زي الترم الاول كلنا حندرس كتابين و ١٦ ساعة طبعا انا الاول كنت مستوى ثالث واطلع بدري واطقطق عالبنات دا الترم اكلت تبن دي المادة مرررررة حلوة وجميلة وللطيفة تحسي تدرسي طب كلها مستشفيات واشياء طبية وتحسي انك بنت طب ومليييانة فوكابلري ما تمزح لازم اول باول تترجمو وتفهمو وتحسو بسببها منجد سرتو تعرفو انقلش لانو اتعلمتو مصطلحات كتير جديدة حتتكلمو عن كل قسم فالمستشفى وكل التخصصات وكدا اشياء حلوة والله بس لازم تزاكرو وتعرفو الكلمات كلها لانها منترة فكل محل فاللسننق والريدنق وكل مكان لازم تصمي وتعرفي .

٢ - مهارات التعلم :

الساعات : ٣ ساعات

نظام التدريس : في دكتورات كثير فكل كم شعبة عندهم نفس الدكتورة

ساعات الدراسة : ٦ ساعات نظري في الاسبوع 

تقسيم الدرجات :

مشاريع وحضور : ٥٠ درجة

حتسو عمل تطوعي ، وفلم وثائقي ( او ابتكار ) ، وبحث ، وبرزنتيشن 

الفاينل : ٥٠ درجة

٩ فصول كل سنة يحذفو فصلين او ٣ فصول 

هادي تعرفو تربية مهنية واسرية وحياتيه ودولا الشلة ؟ نفس الشي مادة تاففففففههة والوحيدة اللي بالعربي ودرجتها مضمونة مافيها ميد بس حتكرفو شغل لازم تختارو قروب يشتغل ولا حتضيعو وحاولو تخلصو اشيائكم من بداية الترم حتى لو التسليم متاخر لانو احنا انضغطنا لما قدمو الاجازة سرنا محنا عارفين نسوي اشياء دي المادة ولا نزاكر فاينل > الفاينل اغلبنا زاكرو فيومتها وما قد فتحنا الكتاب هيا كلامها مليييان دش بس لازم تسلكو لانو اشياء منطقية وبالعقل ما يحتاج تضيعو وقتكم على كل كلمة .

٣ - الكيمياء الحيوية ٢ :

الساعات : ساعتين 

نظام التدريس : حتاخدوها في مدرج مع شعبتين او ٣ كل جزئية تدرسها دكتورة هما ٣ او ٤ دكتورات طوال الترم لكل الشعب نفسهم

ساعات الدراسة : ساعتين نظري في الاسبوع 

تقسيم الدرجات :

الميد تيرم : ٣٥ درجة

المنهج كلو ١٢ محاضرة تقريبا ٥ او ٦ محاضرات فالميد 

الفاينل : ٦٥ درجة

المنهج كامل

دا الترم حيكون اصعب الترم الاول معلومات اساسية وواضحة بس قشور تاخدوها هنا حتتوسعو فديكا القشور ومرة حتبحرو هنا الكلام كتير اول ٤ محاضرات سهلة بعد كدا تسير جامدة ومليانه انزيمات لين تموتي فلازم اول باول اول باول اول باول ولا حتضيعي وتحسي صعبة لانو مرة دسمة بس ممتعه حتشوفو اش العمليات اللي تسير فجسمكم ومرضى السكر ووقت الجوع الصيام ومتى يتكسر الاكل وكيف حتحسو الاكل اللي نبلعو فثواني دا كلو يسير ؟ احلى من الترم الاول لكن ادسم بمليون مرة ولا تسمعو للي يقول صعبه ترا هيا سهلة بس لازم اول باول عشان ترتاحي.

٤ - علم وظائف الاعضاء :

الساعات : ٣ ساعات

نظام التدريس : حتاخدوها في مدرج مع شعبتين او ٣ كل جزئية تدرسها دكتورة هما ٣ او ٤ دكتورات طوال الترم لكل الشعب نفسهم

ساعات الدراسة : ساعتين نظري وساعتين عملي في الاسبوع 

تقسيم الدرجات :

الميد تيرم : ٢٥ درجة

المنهج تقريبا ١٤ محاضرة ٥ او ٦  فالميد وما تدخل الفاينل

الفاينل : ٥٠ درجة

باقي المحاضرات بدون جزئية الميد

العملي  : ٢٥ درجة

حيكون مقسم ما بين عملي نظري وما بين ريبورتات تسلموها وحضور وغياب

انا اشوفها حليوة ولطيفة واغلب البنات كدا حتشوفو اعضاء جسمكم كيف يشتغلو والخلايا حتقولو سبحان الله كتير منجد وعلى قد ما انها طويلة وكلام كتير بس سهلة واسئلتها تجننن اغلبنا درجات عالية جبنا واحلى شي جزئية الميد تنحذف من الفاينل اما الاب ترا سهل اظنو ١٢ محاضرة كان الاختبار كلو تعرفي عالصور ايا صورة حتى لو تافهة ومالها معنى اقروها يجيبوها .

٥ - مهارات برمجة الحاسب الآلي :

الساعات : ٣ ساعات  

نظام التدريس : حتاخدوها في مدرج مع شعبتين او ٣ كل جزئية تدرسها دكتورة هما ٣ او ٤ دكتورات طوال الترم لكل الشعب نفسهم

ساعات الدراسة : ٤ ساعات في الاسبوع 

تقسيم الدرجات :

الميد تيرم : ٣٠ درجة

المنهج ٧ شباتر بس نحنا عشان ظروف الاجازة اتقدمت اخدنا ٥ وربع السادس الميد كان شابترين

الفاينل : ٤٠ درجة

المنهج كامل

العملي : ١٥ درجة

الترم الاول كانت شباتر محددة هنا لا حتذاكري اغلب المنهج لانو كلو يعتمد على بعضو

الكويزات : ١٥ درجة

اون لاين من القسم زي الترم الاول

الصراحة وضعية الفيزيا مدري لي ندرسها بس شوفو هيا دسمة وتعتمد عالفهم ومعلوماتها مرتبطة ببعض بس حتلقو المعلومات نفسها في البداية حتتنحو بس عالاخير حتلقوها سهلة لانها تعتمد عالفهم الحفظ قليل فيها عكس الترم الاول اللي كان كلو حفظ ، حتبرمجو بلغة ال  cوالاشياء اللي الدكاتره يكتبوها ضروري تكتبو وراهم .

* وبكدا تكونو اكشششخ ناس فالدنيا لانكم عديتو دي السنة حتحسو بكمييية انجاز وفخر وتطالعو يالله كيف عديت ؟؟ حتنبسطو من نفسكم كتير والله ، وحتجي مرحلة التخصص هنا عاد الله يوفق الجميع *

احنا معاكم فكل شي ايا شي تبو حسابنا موجود وحتى حساباتنا الشخصية عندكم واتركوكم من الكلام السلبي والخوف كلنا قدرنا وعدينا انتو تقدرو تعدو وتكونو احسن ، والله يوفقكم وتتخصصو فاللي تبو ونفرح فيكم .

إسراء سندي ، طب وجراحة

Twitter : @srora7

التجربة الثالثة :

السلام عليكم 

حتكلم عن تجربتي واحاول اخليكم قد ماتقدرو تعيشيو الجو معايا وتتجنبو الاخطاء المهوله اللي طحت فيها 

كلامي حيكون كتير ويبالو مخمخه قد ماتقدرو 

قبل سنة بزبط ماكنت افكر بالمسار الصحي ابدا او بالاصح ماكنت اتوقع اني في يوم حاكون قادره عليه، التجارب الفاشله اللي في حياتي حكمت عليا اني اقول عن شي مستحيل وسمحت لناس يقولو عني ماقدر وفاشله وماكنت ادري ان التجارب دي تصنع منك شخص يقاوم كل الظروف وان كلام الناس مايودي ولا يجيب وبنهايه كلام اهلي المستمر خلاني احطو الرغبه الاولى وفعلن جاني القبول في السنة التحضيرية للمسار الصحي يوم ٢٠ شوال واليوم دا اعلن فصل جديد من حياتي طبعن بحكم خوفي من التغيير ومن كل شي جديد كنت اقراء تجارب الكل واسئل خلق الله كلهم وربي رزقني بتجربة مختلفه عنهم كلهم مليانة اخطأ والانسان غير معصوم عن الخطأ واللحظات اللي تخليكي تدمعي من الفرح واحيانن ضغط يخليكي تطلعي احسن ماعندك اتعلمي واعطي قد ماتقدري في السنة دي مارح اقولكم اديكي التحضيري سنه من عمرك ويديكي العمر كلو اتوقع حتسميعها من غيري لدرجة حتدي كف اي احد يقولها انا اقلك بذات لو كنتي تحلمي بشي دا من وانتي صغيره وصلتي لحلمك ياشاطره وفضلك تشتغلي عليه عشان يكون احسن مايكون 

ممكن تتعبي شويتين لكن مافي احلى من تعب على حلم كنتي تستنيه من زمان 

حتكلم عن تجربتي في كل ماده وبعدها نصايح عامه حتفيدكم اناشاء الله واغلبها حتكون اخطأ طحت فيها فيمكن تتعلمو منها زي ما انا اتعلمت 

اولا مواد الترم الاول كانت عندنا ( انقليزي - حاسب- كيمياء حيوية١ -الوراثه البشريه -الفيزياء)

الانقليزي : مادة مهمه بسبب عليها ٦ ساعات في المعدل يعني تعتبر باتمان معدلك تجيبي A+ فيها ترفعك جدا وطبعن سنتنا كانت سبيشل فقررو يرجعو اختبار تحديد المستوى ويغيرو الكتب 

وكانت من ٤ مستويات

الاول: يدرسو ٣ كتب وعندهم اختبارين نصفية واختبار نهائي ويدرسو ١٦ ساعه في الاسبوع

التاني :ياخدو كتابين بس واختبار نصفي واختبار فاينل ويدرسو ١٦ ساعه في الاسبوع 

التالت : ياخدو كتاب ويختبرو فيه النصفي والنهائي ويدرسو ٨ ساعات في الاسبوع 

الرابع : اعفاء وياخدو ال A+ على طول 

(ملاحظة : ان كنت من المستويين الاولى ابعد عن اصحاب المستوى التالت لان حيتطقطق عليك في الساعات )

كل المستويات حيكون عندها كويزات وعندها برزنتيشن واسايمنت ووالهوم ورك

طبعن مهما كنتي شايله هم انقليزيتي ضعيفه انا مارح افهم المادة دي حتقويها بشكل كبير وكمان استخدامها والمواد التانيه مارح تقصر ، الحمدلله انا انحطيت في المستوى التالت وكنت ماسيب وحده من المستوى التاني الا اوريها جدولي واضحك ، الماده شبه كتب الثانوي جدا فطحت باول خطأ اني استهرت بالماده بشكل وقلت لغتي كويسه وانا بمشي فيها وماكنت اذاكر اول باول وبنهايه انصدم بكتاب ماعرف كيف احشرو جوا مخي في البداية جاتني دكتورة   كان شرحها نص ونص وسريعه مره يعني ياتلحقي ياما تلحقي لكن شكلو وحده من شعبتي دعت وماكلمنا شهر الا اتغيرت وجاتنا دكتورة بطيئه بشكل يصدم لكن كانت تشرح كل شي وتفهمي منها واتساهلت معانا ومن دكتوره لدكتوره يختلف الوضع انا اختبرت كوزين بس طول الترم وصحبتي اللي من نفس مستوايا كانت كل اسبوع تجيني تقولي عندي كويز لكن دكتورتي نهاية الترم ادتنا اسايمنت لليل وهيا ماخدت الا واحد ووحده من صحباتي كان جوها عليل جدا اختبرت كويز واحد طول الترم وماقد جاها اسايمنت او هوم ورك 

من رغم كل ماكترت الكويزات كل ماتدربتي اكتر وبنفس الوقت غصبن عنك تذاكري اول باول 

، غلطت اني ماديت الماده حقها وكنت اقول زي الثانوي بزبط ولما جا الاختبار النصفي والنهائي انصدمت بعلومات كتير لازم اعرفها في وقت قصير وقد ماتقدري اتدربي في القرمر والفوكاب عشان لا تدخل المعلومات في بعضها اطلبوهم كويزات كتير وبنفس الوقت كان فيه موقع للكتاب فيه اسئله ومواقع للقرمر في قوقل تختبرك 

وبكدا جمعتي ورسختي معلومات للاختبار وللدهر 

الحاسب : الماده دي عليها ساعتين في المعدل حاولت كتير وقعدت ساعه احاول ارقعلكم ليه ندرس الماده دي لكن ماقدرتش الماده دي نسخ لصق من الثانوي بس انو بالانقليزي حتاخدي فيها اجيال الكمبيوتر وانواعها والمكونات والعملي حيكون عن الوورد والبوربوينت والاكسل الماده دي عباره عن A+ في جيبك ترجمي الكلام عشان تفهميه واحفظيه بمخ وخلاص بس حضرتي انا استهرت وبذات بالعملي وبنهايه قعدت اذاكرو وانا اكل وابكي عشان كدا مفتاح النجاح حتى في الماده التافهه دي المذاكرة اول باول حيكون فيه كويز على كل شابتر ودا في مصلحتكم واختبار نصفي واختبار نهائي عملي واختبار نهائي نظري وتركيزك مع الدكتوره حتفيد عليكي وقت جدا من ناحية الترجمة والمذاكره

الوراثه البشرية : الماده دي ممتعه بشكل يخليكي تذاكريها بحماس اما انا كنت اذاكرها لقافه عشان اعرف كيف دا كيف صار عليها ساعتين في المعدل وحتاخدي فيها الدي ان ايه والار ان ايه والانقسامات ونقلها اهم شي لازم تعرفيه ان الماده دي كل المحاضرات مرتبطه ببعض وخلل فيهم حيسويلك مشكله للمحاضرة اللي بعدها عشان كدا ذاكري كل محاضره من يوم ماتاخديها وبرضو في حال اذا مافهمتي فيه اكتر من طريقه عشان تفهمي منها تسجيلات د.اشواق  وفيدوهات اليوتيوب ماتقصر برضو الفهم اساس الماده دي وبرضو اذا فهمتي حتقدري تحفظي بسهوله وتوفرلك وقت وحيكون عليها بس اختبار نصفي ونهائي ولا تراكمو لان المحاضرات كتير واولو تكتبو ملاحظتكم وتستفيدو منها لما تجو تذاكرو والساعات المكتبيه مفيده مره في حالة مافهمتي 

الكيمياء الحيوية: حتسمعو كلام سلبي ماينتهي في الماده دي ونقصت كتير ومستحيل تمشي فيها لكن دخلي من اذن وخرجيه من اذن الماده عليها ساعتين في المعدل والترم دا حيكون فيها عملي

في البداية مرها واول محاضرة ليكي اذا مافهمتي لا تنفجعي افتكر انا اول محاضرة خرجت منهاره وصحبتي خرجت تبكي لكن بعد محاضرتين تقريبا بدينا نفهم ونكتب مع الدكتوره ونركز سر الماده دي انو هيا فهم بحت وانو فيه رابط بين كل محاضرة ومحاضرة ولازم تجمعيها كانها قصة لا السؤال حيجي بالفهم ويخرجو الناس يقولو صعب رغم انو لفكرتي شويه وانتي فاهمه حتحليه على طول واهم شي برضو تذاكريها اول باول وبتركيز جدا الفيدوهات والصور اللي في النت حتساعدك علر الرابط وابدا لا تفكري بالكلام السلبي وماينقص الا اللي راكم المحاضرات والمعتمد على الحفظ او فهم بتسليك وماربط العملي المحاضرات تقريبا متشابهه مع النظري ولا تشيلو همها مره وسهله هنا حيكون فيه اختبار نصفي ونهائي عملي عملي ونهائي عملي نظري ونهائي نظري

الفيزيا:تجربتي في الماده دي لازم تركزو فيها عشان لو اتجنبتو اغلاطي حتجيبي فيها اعلى الدرجات ولازم تنتبهو لان عليها اربعه ساعات في المعدل فيه كويزات وواجبات واختبار نصفي واختبار نهائي عملي ونظري 

الفيزياء كانت من المواد العاديه عندي في الثانوي لكن هنا كان مختلف مره خلصنا اول شابتر وكان تحويلات وكم قانون بسيط وبالانقليزي ويجي الكويز يخرب بيتو اسئلة غريبة وبالقوه حليت فلما خلصت الشابتر التاني ذاكرت من قلب لكن برضو نقصت لكن مع مرور الوقت وبعد ماخلصت نهائي الماده دي اكتشفت كل اغلاطي اولها اني احل سريع سريع بدون ماقرى السؤال واحيانن يحط كلمة تغير المطلوب او الوحدات يكون يبالها تحويل والغلط الاكبر هوا اني افهم القانون واحل على اساسو والمفروض اكون ذكيه اني اعرف كل قانون فيه ارتباط بتاني ويمديني اجيب مجهول من دا القانون اللي حيديني مجهول تاني اعوض فيه ويديني المطلوب والشي الاساسي كمان انو لازم اتدرب واحل قد ماقدر لان التدريب هوا اللي حيوضح كل شي والغلط اللي انا جبتو لنفسي هوا اصحك تفكري تسحبي على اي شي وذاكري من كل مصدر انا ذكرت من كل شي وسحبت من مصدر جا نص الاختبار النصفي منو وسحبت عليه برضو نفسو وجاء النهائي كلو منو بذات الله وكيلكم قلت فيه سؤالين مستحيل يجو واشوفهم قدامي وتحت بعض برضو المصادر تكون واجبات واسئلة سابقه (وفي سنتنا كان فيه واجبات اضافيه والسنه اللي فاتت كان فيه موقع يحلو فيه ) فيمكن تكونو زينا او زي اللي قبل بنسبة للعملي هوا نفس تجارب الثانوي بس مع رسم بياني وحل قوانين سهل مره لكن لا تسهيني ولازم تفهمي التجربة عشان تحلي وانا غلطت اني سبت كم تجربة مافهمتها وخليتها لين وقت الاختبار وانحشرت اتوقع الماده دي استهلكت رصيدي كلو في الاغلاط وماعرفتها الا لما انفكيت من الماده دي واكتشفت انها سهله لكن يبالها احد فاهم يحل وكل ماتدربتي كل ماستفدتي 

كدا خلصنا الترم الاول طيب حتقولي عنو ؟

هوا اول ترم في حياتك الجامعيه ادي نفسك وقت عشان تتأقلمي لغتك ضعيفة ؟ صدقيني اول شهر حتترجمي وتتعبي وتعكي شويه لكن هيا مشكلة تعود بس بنهايه مارح تحسي انها مشكله ولا حتترجمي مع الوقت الا نادرا والدوام الطويل ؟ مع الوقت برضو مارح تحسي لكن يبالك تقسمي وقت صح بذات لاصحاب الجداول الطويله لان لازم تذاكري اول باول وكتير مننا استهان بنقطة المذاكرة وعك بنهايه وادي نفسك حقها اديني نفسك يوم بريك اليوم اللي دوامك مهلك فيه ارتاحي وعندك ويكند خليه فيه الاشياء اللي مافهميتها عشان ترتاحي بالوقت 

حتقابلي ناس كتير الترم دا يقولو بنحول وناس تبكي احيانن بسبب انها انضغطت واللي تقول التحضيري صعب لكن ربي مادخلك القسم دا الا واعرف امكانيتك وعارف مكانك الصح والصعب حيجي بعدو سهل حتخرجي الترم دا ممكن باغلاط زي اغلاطي ودا شي ايجابي عشان نعدلها للترم التاني ونعرف نقطة ضعفنا وقوتنا والنقطة المهمة هنا انو الجامعه مختلفه عن الثانوي وفيها اعتماد على النفس اكتر من الثانوي حماسك اللي كان فيكي اول الترم لا ينطفي هوا اللي حيخليكي تستمري مهما صار وافتكري ناس كتير يستنو يفرحو فيكي وتعبك دا بنهايه مارح يضيع ابدا وبرضو اذا دوبك زعلتي افتكري انو فيه مكافاءه حتنزل وتراضيكي 

الترم التاني :

النيرسنق : او الانقليزية الطبيه وعليها ٤ ساعات في المعدل وبرضو نفس نظام الانقلش لكن هنا مافي مستويات وتاخدي كتابين في الترم زيك زي غيرك و١٦ ساعه في الاسبوع طبعن كانت صدمه للاصحاب المستوى التالت لانهم كانو في دلع لكن برضو الماده دي امتع ماده فعلن في كل التحضيري وتحسسك انك دكتوره فعلن وتدخلي جو وبذات درستني د.انتصار كنت اخد اربعه ساعات في اليوم بدون ماطفش حتى ماده معلوماتها كتير ويبالها اول باول وكل يوم بيومو لكن حتذاكريها بمتعه وانسجام تام وكلها فوكاب والقرمر قليل مره لكن كانت فيه حركة قزره الفوكاب منتشر في كل محل ان كان ليسننق او ريدنق لكن نعيد ونكرر حتى المواضيع اللي تاخديها تحمسك انها ترسخ في بالك زي مثلا تتناقشي مع دكتورتك في مواقف اذا صرلك في المستشفى وكيف حتتصرفي ولازم ترجمي اول باول هنا الكلمات جديده ولازم مره تحفظي معناها بالانقلش ولا تشيلو هم كل دكاترة الماده دي طيبين بالذات دكتورتي كلمة الحب فيها قليلة ( هنا ماغلطت في الماده وبالعكس اديتها حقها وكفايه لكن صادف قرار تقديم الاجازه في وقت سيئ في دراستنا فكان غصبنن عننا ككل نذاكر في مدة قياسيه )

البرمجه: علقت والله وانا احاول اقلكم ليه ناخدها عليها ٣ ساعات في المعدل والفهم ثم الفهم ثم الفهم لان النظري في الماده دي عباره عن فهم عملي ونفس طريقة الحاسب كويزات وعملي ونصفي ونهائي نظري بنسبالي الماده دي مازلطتها بسبب درستني وحده اول مره تدرس وضيعت الدنيا معاها وبديت اتقبلها لما بديت افهمها بنفسي وحتى العملي ماقدرت افهمو الا قبل اختباري النهائي بيومين لكن بصفة عامه اذا فهمتي الشابتر الواحد لما تذاكريه ياخد منك نص ساعه بالكتير والتدريب يلعب دور كل ماتدربتي كل ماصرتي متمكنه اكتر وماتغلطي ابدا

(ملاحظة : الماده دي حتخليكم تسيرو سامجين اذا فهمتو )

علم وظائف الخليه : امتع ماده تخصص حتدرسي الخليه بعدها جهاز جهاز في جسمك يعني لو تحبي الاحياء الماده دي لعبتك واحسها اجمل من احياء الثانوي صراحه الماده تعتمد على الفهم والحفظ مع بعض وبرضو تعتبر من المواد اللي درجتها تنحط في الجيب اهم شي وقت الشرح اكتبي كلامهم لان حيفيد مره واحيانن يجي اسئله منو  وبرضو ليها عملي هنا حتكون متعتكم في الحياه لان كل التجارب تقريبا يبالها مايكروسكوب فتحسي بالحماس والكشخه وفوقها محاضرتها جدا قصيره وسهله وشبه النظري بزبط وجزئية النصفي تنحذف من النهائي لكن برضو المحاضرات كتير ويبالها مذاكره اول باول 

مهارات التعلم : الماده اللي ب٣ ساعات وماخده وضعية التربيه الاسريه في الثانوي والوحيده اللي بالعربي وفوقها كان حظ شعبتي في الماده دي اقشط واربح في الدكاتره كل شويه تتغير لين ثبتنا على وحده دي الماده باتمان الترم دا سهل تجيبي فيها A+ وترفع معدلك النصيحه الوحيده في الماده دي لا تراكمو الاعمال ابدا حيكون عندكم فيها بحث علمي وواجبات وفلم  وثائقي وعمل تطوعي وبرزنتيشن احنى اجلناها لين بعد الاختبار النصفي لكن مالحقنا واتقدمت الاجازه وسار استنفار واحنى نسوي كل دا فعلن كنا نسوي كذا وحده منهم واحنى نذاكر بنفس الوقت فاول باول عشان ترتاحي ووحدة البحث ضروري تفهموها لانها حتساعدكم وانتو تسوو البحث وبرضو في الاختبار النهائي ومارح اقلكم ذاكرو اول باول ولا اي شي بس انو قبل النهائي ادوها يومين او تلاته لان حتطفشو فيها فحاولو قدر الامكان تسلو نفسكم بشي وانتو تذاكرو 

الكيمياء حيوية2: ايوه رجعنا للماده الرزله دي وولاسف انها مرتبطه اشد ارتباط بترم الاول هنا حناخد الانزيمات ونكمل كل شي عن الهضم مثلا اكلنا كيربوهيدرات ايش حيصير هنا فعلن عدلت غلطي وقعدت اذاكر اول باول وطلع معايا فرق كبير وبذات المعلومات هنا كترت ،اشياء كتير تشبه بعض فلازم تفهمو كل تكه وتحفظوها انا بنهايه قررت امسك كل شي واغنيه راب لين احفظوه وصديقني بالفهم والتركيز حتقدري تجيبي درجة عاليه وبذات مافي عملي فيمديكي تركزي كويس عليها 

كدا خلصنا الترم التاني وبصراحه المواد يارب تفيدكم اخطائي بس لان حيفرق من شخص لشخص بسبب طريقة المذاكره والفهم طيب ايش حتقوليلنا عن السنه التحضيريه ؟

بدايتها اتوكلي على الله ممكن تواجهي ناس يحطموكي وناس يحولو وممكن تواجهي صعوبات احيانن لكن اتعلمي تعديها مو تحطمك 

حاولي تكوني متفاعله قد الامكان عشان الدكاتره لو حبوكي مارح تواجهي صعوبة في اي شي

قدر الامكان ذاكري اول باول ايام الدوام الطويله ريحي نفسك لكن الويكند استغليه قدر الامكان مع الوقت حتقدري تستغلي الويكند في مذاكره وخرجه او نوم ومذاكره 

لحد يقلك انو التحضيري صعب هوا يبالو جهد ومخ صافي 

اتمنالكم التوفيق في اعظم سنة من حياتكم يادكاترة المستقبل

غفران سندي ، طب وجراحة

Twitter : @sindi_ghofran 

التجربة الرابعة :

السلام عليكم

لاحظت ان كثير حايسين ح أحاول اكتب كل الجوانب اللي اتطرقتلها في هذي السنه بإذن الله ، السنه التحضيريه الطبيه تعتبر ميزه وشي كويس انها بتهيئنا للتخصص الطبي اللي نبغاه لذلك من وجهه نظري السنه التحضيريه بكبرها عباره عن اختبار والناجح فيه هو اللي يجيب درجات رغم كل الضغوطات اللي حيتعرضها ، خليكم دائم متفائلين ومتحمسين حتى تقدر انك تحقق الشي اللي تبغاه خلي هدفك محدد وحطه قدام عينك وتوكل على الله ، دائما وابدا جدد النية وادع الله ان يكتب لك الخير في دراستك وامورك .

#هنا:عن السنه التحضيريه المسار الطبي في جامعه ام القرى،الخطهالدراسيه واهم النصائح اللي خلتني اخلص هذه السنه بمعدل ممتاز، كل اللي هنا رأيي الخاص ومو شرط نفس النظام على دفعتكم في حاجات ممكن تتغير 

- هنا بعض النصائح والحاجات اللي حتسمعوها اول ماتدخلو سنه تحضيريه :

• الترجمه: لان كل المواد اللي ندرسها بالانجليزي اكيد انتوخايفين من هذا الشي ؟ صح في البدايه راح تتعبو من الترجمه بس مع الوقت حتحفظو الكلمات لان غالبا الكلمات راح تتكرر في المواد ، بالنسبه للناس اللي تشتري ترجمه انا ماانصح بها لانو الاسئله حتجي بالانجليزي وكل ماترجمت انت بنفسك حيساعد تثبت المعلومه اكثر.

• المذاكره: بالنسبه للمذاكره مهم نذاكر اول بأول ابدا لاتحلصو المذاكره ليومها لان مستحيل نلحقوا، أعطوا كل جزئيه حقها ذاكروا كل صغيره وكبيره ،ذاكروا بفهم وذكاء ، اذا فيه حاجه مافهمتوها ابحثوا في قوقل ولا اليوتيوب راح تلقوا شروحات جميله جدا عن نفسي مررا استفدت من اليوتيوب بالذات ، كل الاختبارات اختياري والتصحيح الي، في الاختبار لاتقراو نص السوال وتتسرعو في الاختيار، اقرا السوال وحلل الخيارات بعدين اختار ، اذا ماعرفتوالاجابه ارجعو للخيارات وحللوا كل خيار اذا ينفع او لاواقرب شي اختاروه.

• المحاضرات: لاتسحبو على المحاضرات كثير لان اغلبها مرتبطه ببعض ولما تفهم وتترجم في الكلاس حيساعدك في المذاكره، ابدا لاتروحوا الكلاسات بدون السلايد او المذكرات، حاولوا تكتبو أي حاجه مهمه مع الشرح واذا كان عندكم أوقات فراغ في الجامعه حاولوا تستغلوها في المذاكره او الترجمة.

• في شي مهم ممكن تمر عليك أوقات تتعب من ضغط الدراسه وتفكر انك تحول لقسم ثاني عشان ترتاح..بالعكس لازم تعود نفسك على هذا الوضع وحاول تبسط نفسك وتستمتع فيه عشان تقدر تنجز، اهم شي اتوكلو على الله وتثقوا تماما انو مهما صار نصيبك حيجيك واللي كاتبوا لك ربي هوا الأفضل ، ساعدوا بعض وكونوا علاقات، الن من جد الصحبه اللي معاك هما اللي يهونوا عليك كل التعب والضغط

• بالنسبه للمعدل التراكمي اللي وقف عليه القبول ، الجامعه ماتعلن ومحد يدري النسب اللي بنقولها من توقع البنات على حسب ماشافوا ممكن صح وممكن خطا اللي عليكم انكم تتوكلوا على الله .

مواد الترم الاول :

أولا: اختبار تحديد المستوى

اختبار تحديد المستوى هو اختبار يحدد مستواك واذا جبت المستوى الرابع تأخذ اعفاء يعني تنزلك الماده في المعدل ب +A. بدون ماتدرسها

المواد وعدد ساعاتها:

اللغه الانجليزيه : هذي الماده عدد الساعات كبير ٦ ساعات فيالمعدل ، اكثر المعدل يعتمد عليه لذلك حاول قد ماتقدرو تجيبو فيه  الـA+ .

⁃ اللي ماحصلو على اعفاء راح يكون فيه ٣ مستويات 

⁃ المستوى الاول: يدرسو ٢٠ ساعه في الأسبوع كان عندهم ٣ كتب .

⁃ المستوى الثاني : راح تدرسو ١٦ ساعه في الأسبوع راح تخلصو الكتاب الاول قبل الميد تيرم تختبرو فيه كامل والكتاب  كان جدا سههل

⁃ المستوى الثالث: راح تدرسو ٨ ساعات في الأسبوع في كتاب واحد 

⁃ راح يكون الفاينل للكل في الكتاب مستوى ثلاثه

بالنسه للمنهج على دفعتنا اتغير ودرسنا هذا milestones in English 

طريقتي في المذاكره :

صراحه دخلت وانجليزيتي مو مررا بس كتاب المستوى الثاني كان سهل الى متوسط اذا فيه شي ماعرفت معناه ترجمه على طول وصراحه ماكنت اذاكرو اول ب اول كان سهل بس اذا كنت فيه شي مو مررا اوكيه معاها ارجعلو خاصه القرامر كنت افتح شروحات في اليوتيوب خاصه قناه engVid، اما كتاب المستوى الثالث كان شويه يبغالو اول بأول بس مقدور عليه ان شاءالله.

الاختبارات عندنا بشكل عام تنقسم ل ٣ اقسام ( كل المواد اختباراتها وكويزاتها بالانجليزي ماعدا ماده مهارات التعلم):

1- اختبارات قصيره quiz

2- اختبارات منتصف الترم med-term

3- اختبارات نهائي final exam 

اللغه الانجليزيه الكويزات تختلف من استاذه لأستاذ من ناحيه الاسئله ومن ناحيه عدد الوحدات الداخله في الكويز ،بس نصيحه عشان ترتاحو دايم ذاكرو الكويز كانكم بتختبرو ميد تيرم او فاينل عشان ترتاحو حبتين بعدين .

فيه ٢٠ درجه بيد الدكتوره ممكن تحط درجاتها في مشاركه او واجب او الكويز وبعظهم يعطو ال٢٠ كامله يعني يختلف من دكتوره ل ثانيه .

اما اختبار الميد تيرم ٣٠ درجه : بتكلم عن المستوى الثاني اختبرنا في الكتاب كامل الاختبار كان بالنسبه ليا جدا سههل .

اما الفاينل٥٠ درجه : كان الاختبار في فترتين يعني ١٥ شعبه يختبروفي الفتره الاولى والباقين الفتره الثانيه صراحه كان الاختبار متوسط والبعض كان بيقول سهل .

#نصيحه: اذا كنتو مو تمام بالانجليزي اهتمو وذاكروا اول بأول حطو في بالكم لازم تجيبو ال+A. 

• الحاسب: السوال الدائم والابدى ليش احنا طلاب المسار الطبي بندرس حاسب ؟؟ هذي الماده كانت بالنسبه ليا احلا ماده ، يعتمد بشكل كبير جدا على الحفظ + الترجمه لو ماكنتي تفهمي ، اعتبروها ماده هديه درجاتها في يدكم ، راح تكون ساعتين في المعدل  ، راح تدرسو الحاسب وكوناته واجيال الحاسب وانواعها برضو على دفعتنا اتغير منهج الحاسب ، العملي اخذنا الورد والاكسل والبوربوينت ، توزيع الدرجات للان مو متاكده من التوزيع بس اعتقد 30 ميد + ٢٠ عملي + ٢٠ كويز + ٣٠ فاينل.

#نصيحه: لاتستهتروا بالماده وتقولو سهله زي الثانوي ذاكروا للكويزات مزبوط وحتسهل عليكم المذاكره للميد والفاينل

• الكيمياء الحيوية ( بايو كيمستري): ساعتين في المعدل مالها كويزات ولها جزء عملي ، بالنسبه ليا الماده وقت مذاكرتها جدا ممتعه ، تتكلم عن مكونات الخليه ( الكربوهيدات – الدهون –والبروتين – والفايتمين والمعادن ) نفس اخر فصل في الثانوي بس بتعمق اكثر ، الماده تعتمد على الفهم ثم الحفظ ، كنا ناخذ ساعه واحده في الأسبوع نظري وساعتين معمل ، راح تاخذو الماده ذي مع ثلاث شعب ، كل جزئيه دكتوره راح تعطيكم ، جزئيه الكربوهيدرات اعطتنا هيا د.هبه ( صراحه ماابغى أتكلم ولا عن دكتوره في النظري لاني ماكنت افهم معاهم )، جزئيه الدهون والبروتين اعطتنا د.فاطمه ، جزئيه الفايتمين د.ايناس كنت افهم معاها مهم تطبعو المحاضره وتبعي معاه وتكتبي الملاحظات ، اخر جزئيه المعادن د.نازك مرااا تجنن وتفهمي معاها .

توزيع الدرجات:٢٥ اختبار نصفي بالنسبه ليا كان سهل نوعا ما ، الاختبار النهائي ٥٠ درجه صراح كان اصعب من النصفي لان الجزئيه اكبر و ١٠٠ سوال ( الإحساس اللي كانك تتسلق جبل ) يبقى ٢٥ عملي طبعا المعمل حاجه مختلفه له محاضرات لوحدوواختبارات لوحدو اللي كانت تدرسني في المعمل اسمها د.أمل هيا تمام بس ماتعرف عربي لازم تركزو عشان تفهموا يش تقول واذا احد مافهم تحاول توصل المعلومه اكثر ، راح تكون التجارب عن كشف المكونات الحيويه وال PH. كان فيه اختبار عملي عمليتدخلي المعمل وتسوي التجارب وتكتبي النتائج ، واختبار عملي نظري على محاضرات العملي كان سههل.

#نصيحه: الماده تعتمد بشكل كبير على الفهم والحفظ بشكل مكثف ولاتتهاونوا فيها وفي عدد ساعاتها ، حاولوانكم تاخذو المحاضره تذاكروها في الويك اند او على الأقل قراءة بعد ماتخرجو من الكلاس ، الاسئلة جدا مهمه بعد ماتذاكروا وتختموا ارجعوا لها يساعد في تثبيت المعلومه وممكن في اسئله تتكرر.

• الوراثه البشريه ( الجينتكس): ماده ساعتين في المعدل ثاني ماده تخصص الماده مررا ممتعه ومعلوماتها سهله حتدرسو عن الحمض النووي وانتقاله، الخليه وانقسامها وتضاعف الخلايا  ، الوراثه وانتقال الصفات والطفرات الجينيه ، درستني أ.اشواقالجهني مرره ممتعة تحببك في الماده وشرحها جدا ممتاز هذي المحاضره برضو في المدرج توزيع الدرجات كان ٤٠ ميد و ٦٠ فاينل ، مع ان الماده ممتعه لكن المعل،مات فيها كثير الماده تعتمد على الفهم اكثر الاختبارين اشوفو كان بنفس المستوى كان فيه صح وخطا وكان فيه اسئله سهله واسئله ذكاء.

#نصيحه: الماده تعتمد على الفهم فحاولو ماتغيبو عن المحاضرات وفي المحاضره حاول تجمعو اكبر عدد ممكن من المعلومات واذا مافهمتو اسألو فيه فيديوهات كثيره في اليوتيوب مررا تساعد على الفهم وكمان في موقع د.نداء بوقري مررا الفيديوهات تفيد، التجميعاتمههههمه ، سجلو المحاضرات وممكن ترجعو لها اذا مافهمتو شي ( عشان لااضيع وقت كثير على التسجيل لما كنت ماافهم على نقطه او اتنح كنت اطالع على الجوال واشوف الدقيقهواسجلها جنب النقطه وكذا ).

• الفيزياء الطبيه : ٤ ساعات في المعدل ثاني ماده مهمه بعد الإنجليزي من ناحيه المعدل ، اول شي مدري ليش اسمو فيزياء طبيه اخذنا عن الحركه والقوه والعدسات قوانين نيوتن أشياء سهله ومريتو عليها في الثانوي اكثر ماده راح تسمعو عنها صعبه والاختبارات من المريخ ومحا تمشو فيه اول شي لاتحكمو قبل تجربو بنفسكم بس الماده تحتاج مذاكره اول بأول وحلو الواجبات واتدربو على مسائل كثيره هيا المهم حلو كثيير عشان تسهل عليكم الماده كان كل شابتر فيه كويز يعني حتذاكروا اول بأول،كنا ناخذثلاث ساعات نظري  وساعتين عملي بالنسبه للدكتوره ناسيه اسمها بس ماكنت افهم معاها فكنت اروح عند الدكتورات الثانيات واسئلهم على اللي مو مفهوم وكنت احضر دروس التقويه  اذا كاكنت فاهمه جزئيه معينه. توزيع الدرجات : ٢٥ درجع على نصفي كانت سهله ، ٤٠ درجه الفاينل كان في كم سوال صعب شويه بس مو تعجيزي الاسئله كانت يبغالها تركيز السوال الواحد كان عليه حوالي ١.٦ . يبقى ٣٥ كان تقريبا ٢٥ درجه عملي بعض الشعبهدكتوره النظري هيا العملي والبعض دكتوره ثانيه ، فيه درجات على المذكره وفي اختبار عملي نظري نرسم رسمه والحسابات وفيه اختبار عملي عملي تطبقي التجارب وتسجلي البيانات ، باقي الدرجات على الواجبات والكويز صراحه ذي الماده كرفنا فيها كثير .

#نصيحه: الشي الوحيد بنصحكم فيه انكم تتدربو مررا كثير شوفو التجميعات للسنين السابقه .

مواد الترم الثاني: 

• مهارات التعلم: ٣ ساعات بالمعدل ، هذي الماده الوحيده اللي بالعربي تتكلم عن مهارات الجامعه و البحث العلمي ومهارات التفكير وغيرها  واكثر ماده تضمنو فيها ال +A، توزيع الدرجات 50درجه على اعمال السنه ( عرض برزنتيشن ، بحث علمي او ابتكار، عمل تطوعي و  فيلم وثائقي ) تقسمنا  مجموعات وشرحنا كتب الكترونيه الاستاذه اعطتنا هيا ، بالنسبه للبحث كنا برضومجموعات وتختارو أي موضوع يعجبكم او اذا كان عندكم ابتكار جديد ، العمل التطوعي كل شعبه سوتو مع بعض ، اما الفيلم برضوع كل قروب سو مع بعض واختارو موضوع معين ، ال 50 درجه الثانيه على اختبار النهائي وماكان فيه اختبار نصفي.

#نصيحة: اهتموا في اعمال السنه وحاولو تسووها من بدري عشان ماتنضغطو لما تقرب أيام الاختبارات النهائيه، الاختبار النهائي كان سهل الى متوسط  حتشوفواالكتاب كبير ومليان كلام بس لو قراتوا بفهم وحفظ الحاجات المهمه حتحلو كويس ان شاءالله.

• اللغة الانجليزيه الطبية( النيرسنق): هنا حتاخذو انجليزي لكن ابدا مو نفس الترم الاول، كتابين برضو عليه ٤ ساعات بالمعدل، حتاخذو مصطلحات وكلمات طبية اول مره تسمعو فيها الماده من جد دسمة بس كانت جدا ممتعة مواضيعها كلها عن الطب وحتتعلمو حاجات جديده ومرا مفيده ، من وجهة نظري كان الكتاب الاول يعتمد اعماد كلي على الفوكابلري ..القرامر كان مكرر ، اما الكتاب الثاني كان الفوكابلري فيه مضاعف وفيه اختصارات كثيره والقرامر كان جديد او حاجات قديمه مزودين عليها أشياء .

توزيع الدرجات: نفس الترم الاولى ٢٠ درجه بيد الاستاذه كانت تختبرنا كويزات، ٣٠ درجه النصفي كان الاختبار سهل الى المتوسط  بالنسبه ليا لاني كنت اذاكر الكلمات اول بأول ماكنت اسيب حاجه ـ لكن البنات كانو شايفينه صعب - ، الفاينل اختبرنا الكتاب الثاني الكتاب كان اصعب من الاول بس الاختبار كان جدااا اسههل من النصفي .

وفيه كتيبات صغيره كمان عليها ٥ درجات بونس تنضاف على الدرجه النهائيه ـ فرصه ذهبيه - ، طريقه استاذتنا طلبت من الشعبه كامله ان نلخص الكتاب .

#نصيحة: الماده تحتاج مذاكره اول بأول لان مستحيل تعبي عقلك بكل الكلمات في ليلة الاختبار ولازم تذاكري كل شي وتفهمي كل شي من فوكابليري الى لسيننق وريدنق وقرامر كلو يتذاكر ، الكلمات مو كافيه انك تعرفي معناها بالعربي لازم تحفظي معناها بالانجليزي ، لاتغيبو عن الكلاسات كثير لان الشرح بيساعدك تتذكر الكلمات وبس يارب ما اكون نسيت شي..

• برمجة الحاسب: رجع لنا الحاسب هذه الترم بس برمجة، ٣ ساعات في المعدل مدري ايش دخلها في مجالنا بس يلا مشي حالك ، حتدرسوا فيه لغات البرمجة وبعدين حتاخذوا لغه ++cوتعملو برامج ، حسيتوا اسهل من الترم الاول لان يعتمد على الفهم اكثر من الحفظ ، لما تبداو تطبقوا راح يسير اسهل ، اللي كانت تدرسني صراحه ابد ماكنا نفهم معاها والماده تعتمد مررا على الاستاذه فكنت اخلي صحباتي يشرحولي او ان يسجلو المحاضرات وكنت احضر دروس التقويه .

• الكيمياء الحيويه ٢: ساعتين في المعدل ، الكيمياء ذا الترم مومزحه ابدا حتاخذوا في البدايه عن الانزيمات كانت اسهل جزئيه ، بعدين حتبدا عمليات الايض تكسير وبناء الكربوهيدرات والدهون والبروتينات وكل واحد ودوراته ، هذ يالماده باذات ممكن تكون هيا اصعب ماده في الترم لازم تذاكروه من بدري وتفهموه مزبوط ، هذا الترم مافي عملي بس ساعتين نظري ، توزيع الدرجات: ٣٥ درجه على النصفي و ٦٥ على الاختبار النهائي.

# نصيحه: اذا جيتو تذاكروا  الدورات اكتبوها في أوراق فوق بعض وعلقوها قدامكم وكل شويه طالعو فيها والباقي زي الترم الاول.

• علم وظائف الأعضاء ( فسيولجي ): ٣ ساعات بالمعدل المادهجدا سهل وممتعه مالها كويزات ولها جزء عملي، عيبها الوحيد تعتمد على الحفظ بشكل كبير والمعلومات مررا كثيره ، تعتبر اهم ماده في المسار الطبي كل الأقسام لازم يدرسوها  في البدايهاخذنا الخلايا وبعدين بدانا ناخذ عن جسم الانسان من الجهاز المناعي والجهاز الهضمي تقريبا زي الاحياء درستني د.انعام شرحها مررا تمام اهم شي خليكم معاها  ، اللي حلو فيه ان جزئيه النصفي مادخلوها النهائي، العملي كانت تجارب على المايكروسكوب اللي كانت تدرسني د.وصال تشرح بالعربي وماكانفيه اختبار عملي عملي بس اختبار عملي نظري على مجاضراتالمعمل وكان فيه درجات على الملف والتقارير كل تجربة ، توزيع الدرجات مو متذكره كم بالزبط  ف ماكتبتها .

#نصيحه: الماده تعتبر سهله نوعا ما، تعتمد على الحفظ اكثر شي بس لازم تفهمو وتذاكرو اول بأول ، ولاتنسو بعد ماتخلصو مذاكره اطلعو على الاسئلة . 

وبكذا خلصنا السنه التحضيرية..

خلصنا اول سنه لنا في مشوارنا بداية تحقيق حلم ، صحيح انها كانت سنه صعبه متعبا نفسيا تغيريت فيها تفكيرنا واولويتنا بس كانت فيها بعض الذكريات اللطيفه ، دائما خلوا عندكم هدف تسعون له لانه هوا اللي يعطيكم الدافع تكملوا تذكروا انجازاتكم حتى لو كانت صغيره ونهاية هذه السنة على خير تخليني انسى كل اللحظات خليكم ايجابين ومتفائلين لا تيأسوا ابداً حاولوا تستمتعوا، راح تجيكم أيام تطفشو من المذاكره لكن لكل واحد مننا يعرف ايش اللي يحمسه صح؟

في النهايه ربي يرزقكم التخصصات اللي تتمنوها وحتى لو ما دخلتوا التخصصات اللي تتمنوها اسعوا ورى احلامكم ماتدرون ممكن توصلوا لها وممكن في نص الطريق تكتشفوا ان هذا المكان المناسب لكم.. الله يكتب لكم اللي فيه خير ويرضيكم بيه

أتوقع اني تكلمت عن كل شي بس اذا كان عندكم أي استفسار او تحتاجو مساعده هذا التويتر

وهذي مدونه دفعتنا: https://ahq95.wordpress.com/  فيها حاجات مهمة إن شاءالله تفيدكم.

أروى احمد، تغذيه اكلينكية

__Twitter : @aSum

التجربة الخامسة :

السلام عليكم والرحمة والاكرام على الجميع حختصرلكم قدر الامكان السنة التحضيرية

حقول كلام مهم فالبداية ورح اعيده فنهاية النص كمان واتمنى يعلق ب أذهانكم وتتذكروه بكل لحظة تمر عليكم بذي السنة

السنة التحضيرية 

هيا اجراء اكاديمي يفرز الطلاب والطالبات , شيء حيعود عالجامعة بالنفع بينما انتي مارح يقيس فيك اي شي -بالضبط ولا شيء!-

اكبر خطأ ممكن تسويه انك تقييمي نفسك بقياس مستواك بالتحضيري و تصدقي انه هاذي انتي او انك تستلمِ من بداية الامر 

+ (السنة التحضيرية عمرها ماحتكون عائق لاحلامكم)

بسم الله نبدأ

اولاً :

دام ان بقية صحباتي عرفوكم بالمواد و عدد الساعات وكل شي رح تكون تجربتي خالية من هاذي  الامور عشان اتفادى التكرار بالمعلومات

حقيقي حقول كل شي بشفافية

انا واجهت صعوبة فكل شيء

من البداية للنهاية وحتى الان احمد ربي انها انتهت وفقط

ممكن تكون غلطتي لانه ما كان عندي خلفية كفاية عن نظام الجامعة

وهذا الشي اثّر على مستواي طبعاً والاهم انه اثّر على نفسيتي 

لازم تكون على علم انه عدد الساعات و التقدير فالمواد مهم جداً ويخليك تتوقعي نفسك , تتوقعي معدلك وبناء عليه تكوني جاهزة -نفسياً- لـ اي شي يطرأ عليك 

المصاعب لما حتواجهك ما رح تمهّدلك ابداً 

انتي مهّدي لنفسك و دربيها , فالنهاية الجامعة وضعت السنة التحضيرية عشان تعرف من هم اهل وكفؤ لهاذي التخصصات , عقباتك لازم توقفي بعدها بدون تردد , حس الانهزامية هذا تنسيه لما تبدأ الدراسة 

حطي لنفسك خطة بي وخطة سي وخطط للمالانهاية وتوقعي كل شيء -مافي شي مستحيل-.

ثانياً :

الصحبة حاجة مره مهمة والله لو قعدت اقولكم من اليوم لبكرا مواقف كثير شفتها بعيوني وشفت نتائجها كيف كانت شيء مخيب للآمال بس عشان وحدة مستهترة ممكن تضيّع مستقبل ثلاثة او اربعة معاها ومن اعز صحباتها بدون ما تحس

وممكن تكون حاسه! وقد صارت!.. لا تثقي ثقة عمياء مهما كانت الاسباب

لازم تكوني واعية لوقتك فين بيضيع + مع مين بيضيع

عشان تكوني يقظة دائماً وماتغفلي عن اي سبب يخليك تلومي نفسك بعدين كشخص مقصّر تجاه دراسته

تكوني شخص راضي تمام الرضا و تنالي اللي تستحقيه وتتمنيه بإذن الله✨💜

ثالثاً:

 الخصوصي وما ادراك ما الخصوصي

فعلاً ممكن يكون شيء ضدك اذا ماكان الوقت بصالحك و طول الوقت روحة ورجعة من عند الخصوصي هاذي نكبببببة حقيقية

لازم توفقي بين دراستك الذاتية اليومية واللي مع الخصوصي

خاصتاً الترم اللي حيكون فيه عندكم فيزياء

جدياً حتخسري درجات بالكيلو اذا اهملتي 

انا كنت اروح لخصوصي ثلاثة ايام فالاسبوع وكلها ايام دراسة مو بالويكند + بالويكند كنت اطلع فما كنت ملحّقة ابداً وهببت بالميد..انقذت نفسي ف اخر سبع ساعات قبل الفاينل وربي ما امزح الى الان اتذكر هذاك الوقت بتفاصيله

رجعت من المراجعة مع الخصوصي ليلة الاختبار بالعصر وانا مو فاهمة ولاااشششي من اللي بتقوله

وقتها بالضبط قررت اني ما استسلم واتدرب على كل تمرين يواجهني يومها صارت الغرفة مزبلة ورق و مانمت ليلة الاختبار -وهذا غلط ثاني- لكن مازلت احمد ربي اني استوعبت و فقت على نفسي رغم انها جات متأخر

رابعاً :

ومن الحاجات اللي ممكن تواجه اغلب بنات الجامعة 

المواصلات والباصات للي بيوتهم بعيدة مثلي مشكلة ضياعع وقت فضيييييع  .. لازم تستغلوه 

تحلوا واجباتكم وتذاكروا بالمكتبة واذا عندكم بحوث او عروض جيبوا لابتوب واحد واشتغلوا عليه ك مجموعة او بالتناوب اذا معاك مجموعة من نفس حالتك ..ابداً لا تجلسي فاضية لان بمجرد ماتوصلي البيت بطاريتك حتنتهي فعلياً كل التعب رح ينهال عليك وتنامي ✋🏼.

خامساً :

حاجات بسيطة ممكن تساعدك بالحفاظ على وقتك قدر المستطاع؛ 

١- برنامج BeFocused موجود عالابل ستور والاندرويد 

تقنية الطماطم بشكل عام ب آبلكيشن او بدونه جداً مفيدة وتساعد وقت الخمول اللي يجي بنص الترم وايام الاختبارات اقرؤوا عنها✋🏼.

٢- جداول التقويم الدراسي اللي بالاسبوع واليومية

مهم جداً لكل وحدة عندها هدف تبا توصل له انها تطبع واحد وتكتب فيه كل كويزات و واجبات الاسبوع اللي حتسلمها خلاله

واجمل فقرة لما يجي يوم الخميس و تسوي اكس بالأحمر العريض وانتهى الاسبوع✨.

٣- ممكن تتبعي اسلوب "الثواب والعقاب" كتهذيب للنفس و مكافئة بسيطة لها اذا انجزتي كم كبير من المذاكرة والواجبات جداً شي ممتع ويخليك زي المسطرة ماشية بدون اي تسويف💪🏽.

انا كنت اكافئ نفسي بالنوم او اني اجلس ع تويتر شويتين , واعاقبها ب إني اقفل الجوال وقت المذاكرة يعني بالصريح مذاكرة متواصلة بدون بريك👀

وعاد كل وحدة و مودها واللي تقدر عليه.

سادساً واخيراً زي ماقلتلكم 

التحضيري سنة تتطلب النهوض مهما تعثرت و النسيان مهما انخذلت والسهر مهما تعبت

وبالاخير مارح تكون مقياس لمستواك او عائق لاحلامك ابداً

والدليل..هو اجتيازك ليها ان شاء الله برضا وحب🍃

الله اعلم كم عانيت لاجل الحصول على هذه الرضا وكم عانيت لكتابة هاذي السطور ولعل تكون نفعتكم ونفعتني بمثوبة وغفران من الله🙏🏼

"لكل لحظة نجاح وكل لحظة فشل انا والجميع بحساباتنا الشخصية او بـ @med_pre  معكم سواءً الآن او بعد حين حنكون موجودين وفاتحين اذرعنا لكلامكم واسئلتكم بلا كلل ولا ملل" 

نتمنى لكم الافضل..بالتوفيق💪🏽

ندى الزهيري ، تمريض

Twitter : @shinurlight

التجربة السادسة :

كل شخص له تجربة مختلفة في السنة التحضيرية لكن كلنا اتفقنا على شي واحد وهو إننا نصير شي فعال في المجتمع 💕. 

السنة التحضيرية اخذت من عمري عمر لكن حقيقي هي افضل سنة مرت علي بحلوها ومرّها ، اول متطلب في السنة التحضيرية انّ يكون عندك همة عالية ! ثانياً نذاكر أول بأول لان التسويف هو بداية الفشل. 

كِنت دايم اسمع انّ لازم يكون عندك انقلش كويس ، ودراسة الطب صعبة وكلام كثير محبط ! لكن بديت الترم وتركت كلام الناس ورا ظهري لانّ القدرات تختلف من شخص لثاني أمن بنفسي وبقدراتي وبديت الترم الاول وكنت اذاكر اول بأول بعدها بدينا كويزات وميدتيرم ودخلنا في الفاينل وعدّا الترم الاول بخير وشره والحمدلله 💛🌈. 

جا الترم الثاني والهمة كأنها طاحت شوي 😂، بس حاولت وحاولت لين رفعتها وكملت الترم ودخلنا بالميدتيرم ويادوبك اخذت نفس بعد الجهد اللي بذلته ، جانا قرار تقديم الاختبارات ودخلنا على طول في الفاينل ومذاكرتي اللي كانت اول بأول فادتني ذا الوقت الحمدلله وعرفت وقتها قد ايش كنت اتعب عشان هذي اللحظات ، خلص الترم في غمضة عين ! 

لا أحكيكم عن الارق وقلة الاكل والقلق اللي كنت أمر فيه لكن كلها تهون عشان أوصل لطموحي 😻، اتركو كلام الناس لأنّ انتو اقوى من اي شي ممكن تمرون فيه ! خلو ايمانكم بقدراتكم عالي وتوكلو على الله دائماً وابداً

أتمنى ما كثرت كلام ولا طفشتو مني 😂، أي استفسار أو اي شي ثاني احنا موجودين لكم وعشانكم 💗. 

ملاك الشهري ، طب وجراحة 

Snap&insta : @meek_111

التجربة السابعة :

بتكلم اليوم عن تجربتي في السنة التحضيرية او زي مايسميها البعض (سنة مصيرية) فيها راح يتحدد مصيركم بين الكليات الطبية حتكون اول خطوة لتحقيق حلمكم اللي كنتو بترسموه من طفولتكم نصيحتي لكم في دي السنه كونو ايجابيين قد ماتقدرو وحاولو تبعدو كل البعد عن الناس السلبية اللي كل همها تنشر طاقة سلبية وتصعب الامور. حطو دي العباره ببالكم ( مازرع الله فيك رغبه الوصول لأمر معين الا لأنه يعلم انك ستصل ).       - السنة التحضيرية ماهي تعجيزيه ولا صعبه زي ما بيتكلمو عنها كل اللي يبالها تنظيم وقت عشان تقدرو تنجزو وتجيبو درجات عالية.

‏من اكتر المشاكل اللي واجهتني فيها ضغط الوقت نتيجة عدم التنظيم وكنت من الناس اللي بتراكم المحاضرات لقبل الميد والفاينل بكم يوم😂💔 انتبهو انتبهو تراكمو اي محاضره الشيء اللي بتاخدوه ارجعو البيت راجعوه وارموه صدقوني بس يجي وقت الاختبار حتفتكروه بسرعه بكدا حيكون عندكم وقت اضافي تنبسطو وتستمتعو بحياتكم وكمان دا الشيء حيساعدكم تجيبو درجات عالية بإذن الله❤️.

‏حتدرسو في كل ترم 5 مواد كل ماده عليها ساعات معينة في المعدل :

الترم الاول : اللغة الانجليزية ، الفيزياء الطبية ، الكيمياء الحيوية ، الوراثة البشرية ، حاسب آلي.

الترم الثاني : اللغة الانجليزية الطبية، مهارات التعلم ، الكيمياء الحيوية ٢ ، علم وظائف الاعضاء ، مهارات برمجة الحاسب الآلي .

‏بالنسبه لمادة الانقلش نصيحتي لكم حاولو تجيبو A+ فيها لأن عليها 6 ساعات في المعدل حاولو كمان تجيبو درجات عالية في اختبار تحديد المستوى دا الشيء مره حيفيدكم لأن كل ماكانت درجاتكم عالية حتكونو مستوى تالت او تاخدو اعفاء من دراسه مقرر الانقلش وبكدا حيكون عندكم وقت تركزو ع باقي المواد بالنسبه ليا دخلت اختبار تحديد المستوى ولا اعطيتو وجه وكنت بحل شختك بختك 😂💔 وحطوني مستوى تاني للاسف مع انو مستوايا في الانقلش مره تمام الحمدلله.

‏عموماً ماكان دا الشيء عقبة بس كان الشيء الوحيد اللي يتعبني ساعات الدوام بحكم اني مستوى تاني كنت ادرس 16 ساعه انقلش في الاسبوع فكنت ارجع البيت مهلوكه م اقدر انجز في يومي الحمدلله ايام وعدت😢.

‏حتى لو اتكلمنا عن تجاربنا في التحضيري ماراح توصل لكم بالزبط الين تجربوها زينا وتعيشو ايامها وتفاصيلها رغم انها كانت سنه متعبه للبعض مننا وكنا نقول انها ماراح تخلص الا انو كانت فيها ايام جميله وخفيفه حتقابلو ناس كتير في دي السنه حيشاركوكم تفاصيل ايامكم فيها.

‏المنافسه في دي السنه غير عن باقي سنوات الدراسه لأن الكل يبا يتخصص الكل يبا يثبت وجوده    حاولو تخلصو جهدكم لوجه الله تعالى وابتغو الاجر من الله واحسنو الظن بالله كما قال الله تعالى في الحديث القدسي ( انا عند ظن عبدي بي ) لاتتشائمو ابداً وتفاولو على نفسكم انا حرسب     انا ماحجيب درجات انا حنطرد برا الجامعه ومن دا الكلام اللي كنا بنقوله صدقوني كل شيء مكتوب ومقدر لكم عند الله عز وجل واتأكدو انو كل امر المؤمن خير اي شيء حيصير لكم خيرة حتى لو كان نقص في درجاتكم او تخصصتو في شيء انتو ماتبغوه كونو قنوعين وراضين باللي ربنا حيكتبو لكم حتى لو ماكان نفس اللي ببالكم اكيد هوا الخير لكم وسعادتكم موجوده فيه. ان شاءالله تكون سنه جميله عليكم وتستفيدو منها وتنبسطو فيها والله يكتبلنا ويكتبلكم التوفيق بكل خطوة❤️

‏اتمنى اكون افدتكم بشيء ولو بسيط من تجربتي

‏ولو عندكم اي سؤال عن السنه التحضيريه اتواصلو معايا ع الاكاونت تبعي في تويتر✋🏻.

‏

خوله الحربي ، طب وجراحه

‏Twitter : @xkoki_9

التجربة الثامنة :

اول ما بدا التسجيل على الجامعات اول حاجه كنت رافضتها انو انقبل في ام القرى كنت ابا عزوز مراً 

واول م جاء القبول على عزوز انقبلت في ينبع وبعدها سويت ترقيه وانقبلت في عزوز وفرحت مراً وبعدها مدري ايش ضغطت ولغيت القبول وبعدها جلست في خوف لين جاني القبول في ام القرى والحمدالله فرحت بشكل مو طبيعي بدينا تحضيري ....

 التحضيري اول شي هو يبالو جهد بشكل مو طبيعي  واول شي تسويه كل الا في الثنوي تنسيه لانو اول شي سويته كذا وطبعا في أشياء م تنسي وتفتكريها لما تدرسيها صراحه انا الترم الاول لعبت وما كنت اذاكر اول بأول وكانت الفكره في راسي انو التحضيري زي الثنوي وما كنت اسمع كلام احد وكنت اذاكر قريب الاختبار صح اذاكر بس اضغط نفسي وجبت معدل نازل بس الترم التاني شدِّيت ع نفسي واستغنيت عن خرجات وجمعات وأفلام وحتى النوم عشان اقدر اجيب معدل والحمدالله كنت اذاكر كل يوم وفِي الويكيند اذاكر حقت الأسبوع وبكذا قدرت اتحدى نفسي وأجيب معدل اعلى وزي م قتلكم المذاكره اول بأول هي مفتاح النجاح وزي 

وثاني شي الدراسه شوفو الدراسه هي ماهي صعبه ولا هي سهله في النص وفِي أشياء من الثنوي بس انها انقليزي واذا كنت شايلين همو انا دخلت التحضيري وانقلزيتي ماش والحمدالله شهر بالكثير مشيت فيه زي الفله يعني تبدي تفهمي تبدي تتكلمي وانتي كمان لازم تتطوري انقليزيتك عشان م تتعبي في الترجمه يعني لا تشيلو هم 

وثالث شي المذاكره المذاكره مراً مراً تختلف عن الثنوي اوك  وشئ تاني لازم اقولكم هو ابدا لا تخافوا وقت الاختبار ولا تسهرو ايام المذاكره وتضغطو نفسك لازم يكون في بريكات بالكثير ربع ساعه واصلا اذا كنتي تذاكري اول بأول م تتعبي في النهائي ...

وفِي النهايه ما اقول الا ربنا يوفقكم وتشوفه اسهل م تتخيلو :( ♥️✨

هيام البيشي ، تمريض

Twitter: @Heyam_b

التجربة التاسعة :

السلام عليكم و رحمة الله و بركاته

في البدايه مارح اتكلم بالتفصيل عن المواد و الساعات و كل دا لأنو اكيد سمعتو و قريتو الين طفشتو 

السنه التحضيريه عباره عن "مشقه ممتعه " و لو انو كلمة مشقه كبيره شويتين . 

اول شي ابا اقولو السنه التحضيريه مره مره حلوه و ممتعه و كأول سنه جامعيه هيا تجربه جديده بالنسبالنا اهم شي فيها انكم تقدرو تجمعو بين دراستكم و الاشياء التانيه فحياتكم عشان تعرفو تستمعو بيها .

كتيرين لمن يشوفوني قد ايش انا حابه التحضيري يستغربو و يقولو شكلك كنتي تدرسي فمكان تاني لوحدك . 

لو اللغه الانقليزيه حقتكم كويسه دا شي مره كويس و مره حيساعدكم لكن لا تتساهلو لانو تلاته ارباع المصطلحات و الاشياء اللي حتدرسوها حتكون جديده عليكم و لو الانقليزي تبعكم ضعيف او مو كويس لا تشيلو هم حتتعلمو و حتمشي بإذن الله.

السنه التحضيريه بالنسبالي كانت من اجمل السنين الدراسيه و امتعها صراحه ، بداية التحضيريه و خاصة في الاسابيع اللي بدأت فيها الدراسه كنت اتعمد اترجم كل كلمه و كل جمله و اقعد احفظ احفظ و كنت احسبو صح هوا فادني في اني كنت اعرف معنى الكلام بس ، اما في اني اكون فاهمه المحاضره فولا شي ماستفدت ، احسن طريقه انو تفهمي و تثبتي الكلمه فراسك انك تفهميها زي ماهيا بالانقلش و بالعربي من غير ماتترجميها تحتها او في مكان تاني كدا حتثبت اكتر و تحاولي قد ماتقدري تفتكري المعنى .

مارح اقول زاكري اول بأول و ضحي بخرجات و ... لأنو قدرات الانسان بتختلف من شخص لشخص ، عن نفسي ماكنت ازاكر كل المواد اول بأول في مواد كان لازم ازاكرها كل اسبوع اما بسبب كويز او انو الخصوصيه كانت تشرحلي فيثبت فراسي ، بس الحمدلله اللي قدر انو يمشيني و اعرف احل كويس و المعلومات تثبت فراسي اني كنت ازاكر بفهم و بعدت مره عن الحفظ الا في الاشياء اللي مرا ضروريه و يبالها حفظ و ماكنت اتقيد بالسلايدات بس ، كنت ازاكر من النت و في زملاء و زميلات كانو يسو تفريغات او غيرو و كنت ازاكر منها يعني اتنوع في المزاكره منو استفيد و منو ما اطفش  .

و حقيقي لمن تزاكرو بفهم غير مره حتى بعد الاختبار تفضل المعلومه فراسكم و كمان لمن تربطوها بحاجه تانيه في حياتكم صعب انو تنسوها . 

اهم شي انك تحبو الشي اللي انتو بتدرسو مره حيهون عليكم كل صعب او ضغط حتواجهو و دايماً حطو قدامكم هدفكم و انو بقيلكم بس دي السنه البسيطه و توصلو و حفزو نفسكم لا تستنو تحفيز من احد و زاكرو من كذا مكان مو بس السلايدات اللي عندكم عشان تكونو فاهمين مزبوط احياناً السلايدات يكون موجود فيها الكلام على بعضو و كتير و في النهايه لمن تقرأوه  من مكان تاني يكون جداً سهل ، و ابداً لا تغترو بنفسكم انكم فاهمين مزبوط و الماده سهله برضو زاكرو طول ماعندكم وقت ، مره من المرات غلطت غلط جداً صغير و تافهه و كانت تعتمد عليه تلاته اسئله و نقصت تقريباً ٤-٥ درجات ، الحمدلله عديت و قدرت اعوض بس الين دحين لمن افتكرو ازعل .

لو غلطتو في اختبار او خبصتو مره كتير مو مشكله كملو لا توقفو الين اخر لحظه مداكم تعوضو كلنا بنغلط و كلنا بنتعلم بس اهم حاجه انك تتعلمو من غلطكم و تكملو و تجازفو الين ماتوصلو للشي اللي تعبتو و كرفتو و انضغطتو عشانو و ساعتها ارتاحو  و طلعو كل اللي جوتكم و انتو مخلصين . 

اهم شي ربنا، اؤمنو انو الله الوحيد اللي يعرف طريق الخير لكم و مهما سويتو و اتوقعتو برضو الله الوحيد اللي قادر يقلب كل الامور فلحظه اما لصالحكم او ضدكم .

في النهايه لا تتقيدو بتجربة اي احد كلنا عندنا تجارب مختلفه و كلنا قدراتنا مختلفه و كلنا طموحنا مختلف لا تخلو شي يوقفكم و كملو مهما كانت الاشياء الصعبه اللي بتواجهوها ، زي ماغيركم قدر يوصل انتو كمان تقدرو لأنكم قدها 💪💙. 

وجدان رحالي ، طب وجراحة

Twitter: @wejdan_er

التجربة العاشرة :

مرحباً جميعا ✋🏽💗💗💗

اهلا بيكم كلكم اللي حتشرفونا وحتنوري كليتنا 😍

حتكلم لكم عن تجربتي الخاصه وطبعا كل شخص يختلف عن غيرو بس نحنا نقول تجاربنا عشان تتعلمو وتستفيدو من اخطاءنا وما تكرروها 

اول شي 

كتير كتير يقولو انو السنه التحضيريه سنه صعبه "وهيا عكس كدا والله " هيا فقط سنه مصيريه يعني في النص منتي في الثنوي ولا انتي في الجامعه .

٢-اهم شي فيها المزاكره اول باول وعدم التسويف حتقولي وحتشوفي في سناب كل الناس ما بتزاكر ليش انا ازاكر زيي زيهم وحتهملي وانتي مو عارفه اصلا انو هما زاكرو ودا وقت بريكهم يمكن 

لا تخلي الناس اللي حولك تأثر فيك واختاري الصاحب الجيد ✋🏽

انا والله لمن دخلت التحضيري كان معايا كتير من صحباتي بس الحظ ما حالفني وكنا كل وحده في شعبه " اتشعترنا بالعربي 😂" واحتمال النقل مرا ضئيل ف تقعدي ف شعبتك وانتي ساكته وخلاص 😂🚶🏻 بس والله كان الافضل ليا 

اتعرفت على ناس زي العسل 😭

في البدايه ما كنت متأقلمه وكدا لاني مو اجتماعيه وكنت دايما ساكته ٍحقيقي كنت اطفش ابا وقت البريك عشان اشوف صحباتي بس ما خليت دا الشي عائق ليا بالعكس 

والله لما تكون في شعبه لحالك حتحسي بالمسؤوليه اكتر لكن مع صحباتك حيجرجروك ف كل مكان . وكمان حطيت في بالي مدام ربي خلاني في دي الشعبه يعني هيا الشعبه الكويسا ليا 

وحقيقي مرا انبسطت لمن اتعرفت عليهم 

حسيت اختبار تحديد المستوى مو بس حدد مستوانا بالعكس احس حتى شخصياتنا كمان كانت متقاربه 😂♥️

٣ - 

اهم شي في التحضيري المزاكره اول باول وتنظيم الوقت 

المزاكره اول باول عبال تترجمي وعبال تحفظي وفي البدايه حتتعبي ف الترجمه بعدين حيسير سهل عليك 

تنظيم الوقت : تسوي جدول تحطي منبه اهم شي تزبطي وضعك متى تنامي متى تصحي 

لانك حتمري بايام انو تقعدي ف الجامعه ل٥ يعني دا اليوم حيكون اهلك يوم ف الحياه 

بس ضروري ما تضيعيه في النوم 

لانو التحضيري باختصار نوم قليل -جهد كبير 

انا في البدايه كنت ادعسهها نومه 😂😂وما اصحى الا نص الليل ي دوب اشوف الواجبات واش علينا واش ما علينا واطبع وحوسه 😂 🚶🏻 وعبال تترجمي لانو منجد كانت عقدتي الترجمه " بس مو كل شي يترجم " 

بس بعدين خلاععص حسيت انها النهايه ولازم ازبط وضعي 

٤- منجد دخلت الجامعه كدا ما اعرف راسي من رجولي كنت اقول اش الميد واش الكويز ومدري ايه ؟ مرا حوست مرا مرا وعموما انا طبيعتي كذا في كل مرحله جديده اهبب الدنيا 😂💔

صح بنات السنه اللي فاتت كانو معانا ويساعدونا ونحنا كمان حنساعدكم ان شاء الله 

بس شعور الضياع لازم تحسي بيه 🚶🏻

يعني شي طبيعي تكوني قدام سلايداتك وفجأه تبكي 

عادي عادي مرا نورمال 

٥- اللي خايف من الانقلش ترا الانجليزي مو مقياااسس كتير ما كانت انقليزيتهم كويسا ونجحو وانبسطو بمعدلاتهم 

ليش ؟ لانهم زاكرو باجتهاد ولانهم يبو يوصلو لاحلامهم وكتير استهترو عشان انجليزيتهم كويسا وبعدين انخسفو في المعدل يعني الهرجه مو هرجه قوه اللغه ،الهرجه انو الاجتهاد والتعب كلو عشان توصلو للي تبوه

٦-استغلي وقت فراغك في الجامعه في البيت في اي مكان 

يعني مثلا عبال يجي سواقك او اخوك حلي لك كم هومورك ، ترجمي كم كلمه ، سوي اي شي يفيدك لا تضيعي دي الاوقات

٧- ابعدو عن الناس السلبيه 🚶🏻💔لانو كتير يتأثرو بالناس السلبيه وانا منهم لما احد يقولي دا الشي صعب خلاص يسير صعب في عيوني ومقدر ازاكرو عشان كدا ابعدو عنهم 

-لازم كدا يجوكي حبه حبتين ينكدو عليكم ف الشعبه -😂

-٨- حتقل كتير الخرجات حتجلسي بالاسابيع في البيت عشان تزاكري 

لاتسمعي للناس المحبطه لأنك تحتاجي كل ثانيه في يومك فلاتضيعيها بروحه وجيه 

لأن التحضيري  سنه مصيريه يا تصيب يا تخيب 

ضروري تشدي حيلك وتجتهدي قد ما تقدري بس انو لا توصلي لمرحله الضغط يعني لا تضغطي نفسسسك مرا ولا ترتاحي مرا " خير الامور اوسطها " بس برضو مو معناتو تخلي طول وقتك مزاكره وما تنبسطي او تلعبي 

ضروري يكون في وقت للراحه تريحي فيه دماغك لانك بشر مو آله بس الراحه تكون معقوله وبوقت محدد 

٩-الخصوصي : ًكتير يحسبو ازا اخدت خصوصي خلاص حضمن ال a+ مع انو ماشاء الله اعرف ناس ما اخدو خصوصي وجابو ٤ من ٤ وكتير اخدو خصوصي وما قدر يجيبوها 

الموضوع موضوع اراده واجتهاد يعني الخصوصي محا يسوي شي غير انو حيفهمك الماده مو معناها تراكميها لوقت الميد او الفاينل وبعدين تراكري لا 

الغرض من الخصوصي انو يشرحلك وبعدها على طول تزاكري المحاضره لأنو لو ما اتزاكرت حتكوني ضاااييعه 

واغلب الشباتر او المحاضرات تكون متعلقه ببعض يعني ازا ما فهمتي الاساسيات حتضيعي 

١٠- اخر شي بتكلم لكم عن المواد بشكل عام 

الترم الاول : بايو -جنتك- انقلش-حاسب -فيزيا .

حتكلم عن كل ماده :

البايو : ماده سهله وممتعه بس اختباراتها شويييا تقهر يعني لازم تكوني فاهمتها مزبوطط عشان تقدري تحلي والاسئله تجيكي بلف ودوران شويا بس ما عليها عدد ساعات كتير في المعدل 

عليها ساعتين بس .

في الترم الاول حيكون في بايو عملي ، منتع وجميل للي حتفهمو 

عموما ماده البايو لطيفه وممتعه لكن اختبارها هوا اللي غثيث شويا 

افتكر اول محاضره بايو كنت مركزه مرا وفهمتها الحمدلله جيت تاني محاضره جاتني تناحه العالمين كلها 😂🚶🏻 قلت يلا يمكن افهم التالته جيت التالته وزادت التناحه واحس الدكتوره تقول كلام غريب 

قلت ي اهداب مالك الا خصوصي 

رحت لخصوصي وفهمت الحمدلله الوضع ومشي الحال

لكن انا رحت الخصوصي بعد ما جربت مو على طول 

يعني لما بتختار خصوصي اختار للماده الصعبه عليك ، لا تاخد خصوصي قبل لا تجرب 

.

البايو اكتر ماده تحتاج تركيز لانها كلها اساسيات ، صح ما عليها كتير في المعدل بس برضو تحتاجي تفهميها كويس عشان تقدري تمشي 

الجنتكس : الوراثه 

دي الماده ازا كنتي تحبي احياء ٣ في الثنوي هيا زيو 

نفففس اللي ف الثنوي بالزبط بس انو بالانقلش

ماده عليها ساعتين في المعدل وبرضو ما تأثر 

ماده لطيفه بس ما كنت احبها 🌚😂💔يعني انا الوحيده اللي كنت ما احبها واكترهم يقولو سهله بس مدري انا عكس الناس 🌚😂

انقلش : الانجليزي عليه اكبر عدد ساعات 

عليه ٦ ساعات 

يعني لازم تزاكريه اكتر شي في الحياه لانو ازا نزلتي فيه حينخسف ابو شكل المعدل 

حطي اغلب مجهودك على الانقلش وزاكريه اول باول 

عموما الانقلش اللي في الترم الاول نفس حق الثنوي بالزبط بس يمكن زياده قرامر او قرامرين والفوكاب برضو في

اعيد واكرر لا تستهينو بدي الماده لأنها اكتر ماده عليها عدد ساعات 

صح حتكون في نظركم سهله بس لا تتوقعو الاختبارات تكون بنفس مقياس الثنوي " ما اقول عشان اخوفكم " بس منجد حطو كل تركيزكم عليها 

ولا تغيبو وشاركو مع الاستازه لأنو في يدها ٢٠ درجه 

و٣٠ ميد و٥٠ فاينل 

يختلف على حسب الدكاتره كيف بيقسمو ال ٢٠ بعضهم بس مشاركه 

بعضهم كويزات وكدا 

اهم شي ازا قالت لكم اختارو نصصصيحه اختارو كويزات لأنها تفيددكم وتخليكم تزاكرو غصبا عنكم 

والله اسالو مجرب " في الترم الاول درستني استازه ما تسوي كويزات وربي الكعبه جيت ازاكر في الفاينل احس كل شي جديد عليا ومني فاكره شي ونقصصتت نقص ما يعلمو الا ربنا 💔💔💔

الترم التاني جاتنا دكتوره اول ماسالت تبو كويزات قلت ايييواا واضارب مع شعبتي الا تبا كويزات ومدري ايه واقنعهم لين اقتنعو وفعلاً الكويزات فادتنا كتتتيير والله 😭 

حاسب :اسهل ماده في الحياه " للناس اللي تحب الحفظ" 

كلها حفظ ومرا سهله يمكن غثيثه شويا ف الشرح بس مرا حتنبسطو بدرجاتكم فيها 

بس برضو لا تهملوها لانو عليها ٣ ساعات وازا نقصتو فيها مرا حيأثر على المعدل 

يعني دام انها سهله لا تستهينو فيها وحاولو تجيبو الفل مارك فيها

ماده تتكلم عن الشبكات ووسائل الاتصال " نفس حق الثنوي بالزبط " بس بالانقلش  ، احسكم حتفقعوني كل شي نفس حق الثنوي 

بس حقيقي والله كلو نفس الثنوي 🚶🏻

الففيزياء:

ماده عليها ٤ ساعات في المعدل 

نفس حق الثنوي والله 😂بس انو الغثيث فيها انو ع السوال الواحد درجتين 🚶🏻💔 يعني ضروري تزاكروها بشدده واول باول وما تستهينو فيها لأنو حيجيبو لكم اسئله تلحس المخ وتحتاج واحد فاهم مو حافظ 

كل الاختبار حيكون مسائل يمكن سوال او سوالين اللي حتكون نظري 

يعني لا تهتمو بالنظري كتير اهم شي تحلو مسائل قد ما تقدرو .

وطبعا عليها كويزات ودا من صالحكم 

البايو والجنتكس ما عليهم كويزات 

لكن الباقي فيه كويزات . 

خلصنا الترم الاول .

مواد الترم التاني :

بايو٢،فسيولوجي😍.نيرسينق، مهارات 💙، برمجة

بايو ٢: حيكون اتقل من بايو ١ حيتكلم عن الكربوهيدرات والدهون والڤايتمن والمنرالز 

والله والله ممتع وحلو ولزيز بس مشكلتو الاختبارات 

لازم تراكروه كوييسسس 

عليه ساعتين في المعدل يعني ما يأثر مرا 

بس كلو اشياء اساسيه يعني لازم تفهمي عشان تقدري تكملي وممكن انو ينعاد في سنه تانيه وتالت 

سو . لا تستهينو بيه واسئلتو شويا جامده 🚶🏻

فسيولوجي 😍:

افضل واسهل ماده على الاطلاق 

عليها ٣ ساعات في المعدل .

يمكن الماده طويله وكلها حفظ بس حقيقي حتنبسطو من درجاتكم فيها لأنو الاسئله جداً سهله وواضحه بدون لف ودوران 

نيرسينق : ماده مصطلحات طبيه 

كل ابو شكلها مصطلحات ،مادده ممتعه جداً بس مزاكرتها شويا تحتاج لأنها كلها مصطلحات  وفوكاب وكدا

عليها ٤ ساعات في المعدل يعني تأثر مرا ع المعدل

بس بجد لما تزاكريها تحسي انك طالبه طب وحقيقي مرا تنبسطي لمن تشوفي اشياء جديده ومتعلقه كلها بالطب 

المهارات : دي الماده زي المهارات اللي في الثنوي 

انا احسو كلام فاضي 😂🚶🏻

بس الشي الحلو فيها انو ماده بالعربي وكلو كلام من واقعنا يعني 

وعليها عدد ساعات كبير يعني حتضمني درجاتك بالراحه فيها وحتستفيدي منها انو ترفع معدلك .

بس يمكن مشكلتها انو فيها مشاريع كتير وبحث وكدا 

بس والله ازا اخترتي قروب كويس مرا حيزبط وضعك وحتنبسطي.

برمجه:ماده جميله بالنسبالي مدري كتير كانو متأزمين منها وحوسه لكن الناس اللي تحب الفهم مرا حتنبسط في دي الماده مرا 

عليها ٣ ساعات في المعدل .

وبس والله بكدا انتهينا .

في الاخير بس بقول انو كل شخص حتختلف تجربتو عن التاني بس نحنا نقلكم تجاربنا عشان تستفيدو وتتعلمو من اخطاءنا ✋

اي سؤال او استفسار الدايركت مفتوح لكم كلكم ✋💙

أهداب باوشخه ، طب وجراحة

Twitter: @i_Ahdab

التجربة الحادية عشر :

" أنا أؤمن بأنه إذا ظل المرء ينظر دائماً إلى السماء ، فسوف تنمو له أجنحة في نهاية المطاف 🌟" جوستاف فلوبيرت

ثق تماما ان الله وضعك في المكان المناسب و تأكد إنك داخل عالم ثاني عالم مختلف كلياً كثير أيام حلوة راح تمر عليك في السنة التحضيرية وبتبقى ذكريات سعيدة ماتتنسي بس كمان حتمر أيام صعبة لكن شويا قدام حتحس انك تغلبت عليها لو صبرت واحتسبت! 

 وهنا أحب أذكر تجربتي كتوثيق ليا وفي نفس الوقت يارب تفيدكم :

في يوم 1437/10/19 وصلني أحلى خبر بحياتي الخبر اللي كنت أستناه وأحلم بيه من سنين وهو قبولي في المسار الطبي ، بيني وبينكم كنت متشوقة اكثر شيء للبس السكراب واللاب كوت 😂 "ما انسى ردة فعل اهلي في اول مرا البسهم فيها :("

المهم خلصت الاجازة واخيرا جاء اليوم اللي حروح فيه الجامعة على اني طالبة طب ^كنت من زمان كل ما اروح لها يا اما لاختبار قدرات ولا تحصيلي :)

ماعلينا .. دخلت شعبتي وكانت الساعتين الاولى فاضين وبعدين كان عندنا اول محاضرة ناخذها في التحضيري ( فيزياء )

وهنا كانت أول صدمة ليا لأني مافهمت ولا كلمة وولا حرف خرجت وانا مخروشه ومن هنا اقول راح تحس بهذا الاحساس لا تستغرب ترى جدا طبيعي يمر اول اسبوع بتناحة..

بعد المحاضرة رحت اخذ كتاب الانقلش وهنا كانت الصدمة الثانية وهيا انهم حطوني في المستوى الثالث وكنت اقولهم لا انا مابغى المستوى الثالث لأني اعرف انقليزيتي ضعييييفة مرا حطوني في المستوى الاول قالتلي احمدي ربك الكل يتمنى المستوى هذا ^المستوى الثالث ندرس فيه 8 ساعات ، المستوى الثاني 16 ساعة ، المستوى الاول 20 ساعة.

المهم آمنت بالله وخرجت رجعت للبيت ابكي خوف وقلق من الجاي وصرت اقول لاهلي مابغى اكمل لاني ماقدر 

ايوا من اول يوم واول محاضرة 😂😂 حتى اليوم الثاني رحت وانا مواصلة مانمت من زود الخوف والقلق وكثرة التفكير 

جاء اليوم الثاني وكان نفسي اغير شعبتي واروح مع صحباتي وغير كذا عشان دكتورة عندي بس قلت بستخير اول وفعلا استخرت في تغيير شعبتي واستخرت حتى في مستوى الانقلش وحتى في تغيير الدكتورة هذه الله يذكرها بالخير ومشيت وانا متوكلة على الله ، دحين احمد ربي الف مرا اني ماغيرت شعبتي ولا المستوى *معلومة كنت اخذ مشوار 4 ساعات روحة ورجعة ف كان المستوى وعدد الساعات بالعكس مرا كويس ليا ومخفف عني كثير فالحمدلله* أمانة يعني خجلت من نفسي كيف قدرت اخلي خوفي وقلقي تتغلب عليا ومعايا ربي 💙 وبدأت افكر ان كل اللي وصلوا مو احسن مني زي ما هما وصلوا انا كمان اقدر.. مرّت الأيام وبدأت اتأقلم على جو الجامعة الحمدلله وخلصنا الترم الاول بمعدل يعتبر مو عالي ولا نازل مرا وجات الاجازة بين الترمين ومن ثاني يوم بدأت اكتب كل الاخطاء حقت الترم الاول عشان احاول اتجنبها ، خلصت الاجازة وبدأ الترم الثاني وبدأت أنا تحدي مع نفسي في اني اكون احسن ، كان الترم الثاني ابسط من الترم الاول يمكن عشان المواد! مافي فيزياء! او يمكن لاني بدأت اعرف اكثر كيف انظم وقتي! جاء الوقت اللي نرتب فيه الرغبات وحطيت اسنان بناء على رغبة مني من زمان ورغبة والدي وبدأت اخطط ايش ابغى لقدام حسيت التغذية حيفيدني اكثر في اللي ابغاه وغيرت الرغبة من اسنان لتغذية ، بعدها بفترة كنا نتكلم انا  ووحدة من صحباتي وحكتني عن شخص لف الدنيا عشان يتشافى من اعوجاج ظهره لكن ماعرف السبب وماتشافى الا بعد الله ثم العلاج الطبيعي وقلت ليش ما اقرأ عنو وفعلا بحثت وقرأت وحبيت التخصص جدددا وغيرت الرغبة من تغذية الى علاج طبيعي وفي هذه الفترة قد خلصنا اختبارات ونزلت المعدلات والحمدلله كان معدلي اعلى مقارنة بالترم الاول وقلت بستخير كمان مرا بخصوص التخصصات واحترت بين العلاج الطبيعي والطب والجراحة على اني ابدا ماكنت ابغى الطب والجراحة وما فكرت فيه ولا حتى 1% لكن في اخر لحظة قررت اغير الرغبة الاولى من علاج طبيعي ل الطب والجراحة وبعد ماغيرت على طول ارسلوا ان الرغبات دوبها قفلت وماعاد رجعت لها..

افتكر ذيك اللحظة بكييييت سبحان الله! كيف ربي قادر انه يغير كل شيء كللل شيء وكأنه يقولي الطب والجراحة خير لك ان شاء الله 😭💙 ونزلت التخصصات ووصلتني الرسالة :

مبروك تم تخصيصك في الطب والجراحة.

ككككللللووشش زغرطي يا انشراااح ماشاء الله تبارك الله والحمدلله" بكاشة ماكانت كذا ردة الفعل بل لابد من دمعتين فرح 😂" ، هنا بأسرد لكم واعطيكم المهم من التجربة كلها :

اول شيء دايما تذكروا ان ربي معانا وحاس بينا ، اتعب على نفسك كثير السنة هذه والله على قد ماتتعب وتجتهد راح تحصد ثمار ولاتحط في بالك انه التخصص اللي انا ابغاه مايتطلب معدل عالي خليني افلها ماعليه لالالا انتبه تفكر كذا دايما خلي طموحك عااااالي ولا تستهين بنفسك ولاتقارن نفسك بأحد وفيه كلمة دايما اقولها لصحباتي " عمركم لاترضو بالقليل " وطالع فوق ايوا فووووق 💕

- ذاكر المحاضرات اول باول لا تراكم على نفسك ^  للاسف احد اغلاطي في الترم الاول

- ترجم المحاضرات وراح تتعب في الترجمة في البداية بس نهاية السنة ممكن كلمة كلمتين اللي تترجم في كل المحاضرة 

- وقت المحاضرة خلي في يدك قلم وسجل الكلام المهم اللي يقوله الدكتور/ة 

- راح تسمع كثير يحطموك راح تسمع ان السنة هذه صعبة ان المادة هذه صعبة بس انا اقولك امشي وقفل اذنك وخليك واثق من نفسك

- حاول تنظم وقتك لان كل مانظمت وقتك كل ماكان عندك الوقت الكافي للترفيه عن نفسك 

- استمتع قد ماتقدر ، السنة هذه على قد ماهيا متعبة على قد مافيها كثييير اشياء حلوة وممتعة وراح تتعلم منها الكثير الكثير والكلام هذا راح تفتكروا في نهاية السنة 

- نصييييحة العمر 💫 كل ماتعبت! اسجد لربي كل مامريت بلحظة حزن ضعف او فرح اسجد لربي والله في كل لحظة ضعف ربي راح يرسلك شيء يقويك ويصبرك..

خلي حلمك قدامك وركز عليه وحارب عشانه لا توقف وولاتيأس ودايما حفز نفسك ، وصل اللهم وبارك على سيدنا محمد بكذا انا خلصت وادري طولت :)

 الله يوفقنا وينور بصائرنا ويحقق كل احلامنا ويبلغ اهلنا فينا يارب..

رهف الحربي ، طب وجراحة

Twitter : @ra_Ah9

وبكدا وصلنا لاخر تجربة نتمنى انكم اخدتو دافع ايجابي واتحمستو ، ولا تنسو تنشروها لطلاب الثانوي وتفيدوهم .